Díli, yokalaumedia.com (19/09/2023) – Ministru Petrolium no Rekursu Minerais (MPRM), Francisco da Costa Monteiro, simu reprezentante Austrália ba Greater Sunrise, Steve Bracks, hodi ko’alia prosesu no mekanizmu atu dada kadoras mai Timor-Leste iha tempu badak nia laran.

“Australia rekoeñese katak projetu greater sunrise importante tebes ba povu Timor no Timor-Leste, no iha tempu badak sei prosesa dada kadoras mai Timor-Leste”, haktuir Steve Bracks, hafoin enkontru, iha Farol, tersa-feira, (19/09).

Iha fatin hanesan Ministru Petrolium Rekursu no Minerais (MPRM), Francisco Monteiro haktuir katak ohin hasoru malu ne’e foka liu ba projetu Greater sunrise

“ohin ami hasoru malu ko’alia liga liu ba projetu Greater Sunrise ami deside hamutuk katak fulan outubru ita komesa ativa fali negosiasoes sira ne’ebe mak durante ne’e paradu uituan, nune’e ita bele atinji dokumentus importante balun ne’ebe mak nesesariu ita presisa halo hodi lori projetu ne’e ba tinan oin, sebele ita toma desizaun konjunta ida entre Timor-Leste no Austrália bele lori greater sunrise mai Timor”, haktuir Franscisco Monteiro.

Governante ne’e mos afirma katak dokumentus sira ne’ebe mak presisa hanesan petrolium money Cost, tax regime ho Production Contact, ne’ebe importante ne’e presisa prosesa hotu lalais atu nune’e bele prosesa projetu Greater sunrise mai timor-Leste.

“ohin ha’u komversa ona ho Sr. Steve atu nune’e hetan apoiu husi governu Austrália nian para ekipa rua (Timor-Leste ho Austrália) ho mos Timor GAP atu bele intensifika enkontru iha fulan sira oin mai hodi bele rezolve tiha dokumentus tolu prinsipal ne’e”, tenik Francisco.

Alein de ne’e mos koalia mos kona ba Slaek Konsep Study ne’ebe nesesariu atu nune’e bele fo konfiansa ba parte hotu.

“Timor-Leste iha ona nia estudu lubuk ida, ita hotu hatene agora to’o tempu ona para ita tau iha meja diskuti buat ne’e ho klean hatudu ba malu transparantemente ho responsabilidade hodi ita ba to’o iha konkluzaun ida hodi ita bele buka solusaun ba dezenvolvimentu kampu Greater Sunrise, uluk kedas imi hatene Timor-Leste nia hanoin katak dezenvolvimentu ida di’ak mak dada kadoras mai, maibe ida ne’e prosesu ida presija deskute kle’an ho ita nia amigo Sr.Steve Bracks”, afirma Governante.

Reportagem : Eva Ximenes

 2,371 Tatal Lee,  2 Views Today