Viqueque-Builale, yokalaumedia.com (20/09/2023) – Sunu rai arbiru iha Aldeia Hei-huta Suku Builale Postu Adminitrativa Ossú Munisipiu Vikeke estraga total uma lisan 2 husi lisan LULI LAKU, iha tuku 16:00 loron 19 setembru tinan ne’e.

Nazario da Costa Rangel, jerasaun husi uma lisan LULI-LAKU ne’ebe testamuña akontesimentu triste ne’e haktuir katak insendiu ne’e akontese iha tuku 04:00 lorokraik.

“uma lisan 2 ne’e situa iha knua Kaia-Ho’o, dook oituan husi komunidade nia hela fatin,  insendiu kauza husi ema ne’ebe sunu rai arbiru, hodi ahi oan no ahi klak semo tuir anin no da’et ba uma lisan ne’e nia kakuluk taka ho du’ut, kapim. Momentu ne’e mos anin bo’ot kompara ho loron anterior sira”, haktuir Nazário.

Komunidade no família susar atu hamate ahi refere tanba uma lisan 2 ne’e situa dook husi bee matan inklui sasan sira ne’ebe rai iha uma lisan barak mos ahi estraga total.

“ami, komunidade hamutuk ho familia, uma lisan LULI LAKU la konsege salva tamba bee matan dook husi uma lisan rua ne’e. Iha Uma lisan bo’ot ne’ebe hanaran uma matebian, Ami konsege salva mak sasan lulik ne’e ami adora ho lian materna Midiki DABU-ANA, maibe sasan seluk Tais Feto no Mane, Luhuu, mama-fatin (retiana-lian Midiki) ne’ebe uza hodi serve ka tau hahan ba matebian sira, inklui bikan, kanuru, Balde, hare kluit saku haat no batar talin rua hamutuk la konsege salva. Enkuantu iha uma lisan ki’ik ne’ebe hanaran uma debu, ami konsege salva de’it sasan lulik hanesan DABU-ANA, maibe sasan seluk hanesan Biti tali inklui sasan pertensia ba uma refere hetan estragu total”, konta Nazário ho laran triste iha nia rezidénsia Raebuti-Ana, Builale.

Hafoin akontesimentu ne’e família hato’o kedas informasaun ne’e ba autoriedade lokal, Xefe Suku no Xefe Aldeia Henihuta.

Entretantu, Xefe aldeia Henihuta, Hernanio de Carvalho, kestiona konaba atitude ema deskoñesidu nian ne’ebe estraga ema barak nia bens sira tanba ne’e liu husi biban ne’e husu autoriedade kompetente, Munisipal no Nasionál, atu tau iha konsiderasaun hodi evita asaun ne’e iha futuru.

“husu ba parte relavante bele kria lei regula ba atetude ida ne’ebe atu estraga rikusoin natural no rikeza komunidade sira nian”, husu Hernanio.

Xefi aldeia Henihuta reprezenta familia husi uma lisan LULI LAKO husu tulun no apoiu husi Ministero relavante atu apoia hodi konstrui fali uma lisan rua ne’e.

“Ha’u lori familia uma lisan luli laku nia naran hato’o ba estadu, espesialmente  ba  Xefe Estadu, Primeriu-Ministru, no Ministériu Juventude, Desportu, Arte no Kultura atu ajuda fali familia hodi bele konstrui fila fali  uma lisan luli lako atu sai mahun ba sira nafatin”, husu Xefe Aldeia.

Reportagem : Mário Cruz

 5,777 Tatal Lee,  1 Views Today