Díli, yokalaumedia.com (28/05/2023) – Unidade Polísia Marítima (UPM) hahu simu responsabilidade husi Polisia Nasoes Unidas ninian, iha tinan 2003 tuir dekretu lei Nú 09, lei organika Polisia Nasional Timor-Leste ne’ebe promulga husi prezidente Repúblika, Kayrala Xanana Gusmão, hodi transforma Unidade Seguransa Marítima (USM) ba Unidade Polisia Marítima (UPM) hodi sai hanesan unidade ida iha PNTL atu tau matan ba área kosteira no fo seguransa ba tasi Timor-Leste nian.

Loron 27 maio tinan 2023 ne’e UPM kompleta nia ezisténsia ba dala 20 ne’ebe selebra iha Quartel UPM Lesidere Sabado (27/05) foin lalais ne’e.

Komandante Unidade Polísia Marítima,  Superintendente Eugénio Pereira, espresa sira nia prontidaun hodi servi Timor-Leste, espesialmente tau matan ba tasi.

“Ami asumi misaun ida atu garante siguransa ba iha zona marítima, prevensaun, supresaun ba krime jerál no aktu ilisitu sira seluk ne’ebe akontese iha área kosteira, prevensaun no kombate poluisaun tasi, asegura tasi no mos rekursu iha tasi ho lema ida Servir e proteger”, hateten Eugénio.

Iha parte seluk UPM mos kontinua reforsa misaun hodi garante seguransa iha Teritoriu Tasi Timor liu husi estabelesimentu postu vizilansia iha area kosteira sira hodi halo salvamentu e busca maske hasoru limitasaun.

Superintendente Polisia Eugenio relata katak iha mandatu Komandante Jerál no II komandante Jerál difini ona área 5 prioridade atu hadia mak hanesan hadia jestaun Instituisionál, haforsa Lejislasaun, estabelese Koperasaun Instituisionál ne’e di’ak, Atendementu Públiku no hametin paz no estabilidade seguransa interna. Iha mos programa prioridade husi UPM nian mak hanesan Jestaun Operasaun, Jestaun Administrasaun, Lejislasaun, Infrastrutura no kapasitasaun.

“treinamentu iha area navegasaun ba membru UPM apoia husi parseiru dezenvolvimentu sira: Instituisaun Falintil-Forsa Defeza Timor-Leste (F-FDTL) espesial liu komponente Naval, TLPDP, JICA, UNODC no KOIKA”, afirma Superintendente.

Vise-Ministru Interior, António Armindo, entretanto, apresia UPM nia servisu no dedikasaun sira hodi proteje tasi Timor ne’ebe luan tebes.

“Hau lori Ministru Interior ou Primeiru-Ministru nia naran hakarak parabeniza ita bo’ot sira hotu, ba imi nia servisu no dedikasaun tomak ne’ebe hatudu ona durante ne’e, hau fiar katak sei sai di’ak no solidu liu tan hodi asegura seguransa marítima no fo liberdade ba ita nia peskador sira hodi halo aktividade iha tasi laran inklui movimentasaun iha ita nian tasi leten”, katak Vise-Ministru Interior, António Armindo, iha nia diskursu, Sábadu, 27/05.

Membru governu refere aprofunda liu tan katak governu kontinua tau atensaun nafatin, liu husi sosa ro patrullamentu ne’ebe no ekipamentu ne’ebe adekuadu hodi bele uza ba operasaun no kontrolu ba iha tasi ho máximu liu-liu iha parte kosta sul ne-ebe riku tebes ho ikan no rikusoin seluk ne’ebe durante ne’e menus kontrola nune’e hodi fo biban peskador ilegal ne’ebe kontinua na’ok  Timor-Leste.

Reportagem : Eva Ximenes

 2,749 Tatal Lee,  2 Views Today