Díli, yokalaumedia.com (12/06/2023) – Polisia Nasionál Timor-Leste (PNTL), Departamentu Tránzitu Nasionál (DTN) Rezistu dezde fulan Janeiru to’o maio, ema na’in 28 lakon vida tamba Asidente tráfigu.

Xefe Departamentu Tránzitu no Seguransa Rodoviáriu Interinu, superintendente António da Luz hateten asuntu ne’e bainhira organiza konferénsia imprensa ida iha Kuartel Jerál PNTL Caicoli, segunda-feira (12/06) ne’e.

“Kazu (asidente) hamutuk 788, iha kazu refere fahe ba parte tolu hanesan kanek kma’an hamutuk 1.016, kanek todan hamutuk 161 no mate hamutuk 28 husi fulan Janeiru to’o 31 maio 2023”, informa António da Luz.

Komandante Polísia komunitária no porta-Voz PNTL ne’e mos Esplika katak asidente ne’e akontese tanba fator 4 hanesan: Erru  umanu (90%), Fator kondisaun Veíkulu iha (5%), Fator dalan/Estrada iha (5%). No husu nafatin ba sidadaun, utente transporte sira atu konduz motor ho kareta karik labele konsumu tua tamba bele fo risku ba sira nia-an no ema seluk nia vida.

Husi dadus hirak ne’e kazu 23 mak enkamiña ona ba Tribunal, sei iha prosesu hamutuk kazu 361 no rezolve tuir dalan família hamutuk kazu 367.

PNTL mos durante ne’e aplika pena, tuir lei kódigu estrada, ba sidadaun hirak ne’ebe viola hodi kontribui ba reseita nasionál.

“ami mos hakarak hato’o katak ami rekolla husi janeiru-31 maio hamutuk dolar $ 312.133  munisipiu sira ne’ebe mak rekolla koemas barak liu mak husi Munisipiu Díli hamutuk dolar $ 176.922, ida ne’e mak hatama ba kaixa Jerál do Estadu”, haktuir superintendente da Luz.

Porta voz ne’e mos sublinha liu tan katak PNTL mos rekolla reseita husi postu seguransa iha área fronteira sira mak hanesan Batugade, Salele no Sakato.

“ita hatama koimas ba kofre estadu hamutuk $ 60.427: postu Batugade hamutuk $ 41.059, Posto Salele hamutuk $ 14.823 no husi postu Sakato hamutuk $ 4.545”, Sublinha Porta-Voz PNTL.

Reportajem : Eva Ximenes

 2,048 Tatal Lee,  1 Views Today