Dili, yokalaumedia.com (14/06/2023)-Reprezentante Musulmanu iha Timor-Leste, Arif Abdullah Sagran, klarifika katak informasaun ne’ebe lansa iha média sosiál katak Sidadaun Pakistaun na’in 8 ne’ebe horseik tama iha Timor-Leste hanesan Terorista ne’e informasaun lalo’os.

Arif Sagran fundamenta katak pakistanéz hirak ne’e mai atu hala’o sira nia misaun hodi haklaken doutrina izlaun ne’ebe koinside mos ho selebrasaun loron “Idhul Adha” ne’ebe sei monu iha loron 28 fulan ne’e.

“Sidadaun husi Pakistaun na’in 8 ne’e, antes atu mai hato’o uluk ona informasaun mai ami no ami mos halo ona karta pedidu formal ida ba iha Vise-Ministru Interior no ami hetan ona despaxu antes fulan ida. Ami mos halo kordenasaun di’ak ho imigrasaun to’o loron horseik. Sira to’o iha Díli ho di’ak, ha’u pesoal lasatisfeitu ho parte balun nia hanoin ne’ebe dehan atu estraga fali relasaun entre relijiaun rua ne’ebe mak durante ne’e hare malu di’ak tebes iha ita nia nasaun ne’e”, deklara Sagran hafoin hasoru malu ho Vise-Ministru Interior iha .

Grupu Jemaah Tabligh ne’e sei hela iha ne’e durante loron 25 nia laran no sei ba vizita iha munisipiu Baucau, Lospalos ho Same, depois partisipa mos iha loron bo’ot Idhul Adha.

Arif sagran mos salienta liu tan katak misionáriu hirak ne’e mai ho grupu Jemaah Tabligh ne’ebe dedika sira nia an ba relijiaun espesialmente Izlaun ne’e kompostu husi ema husi rai barak.

“sira ne’e mai ho grupu ida naran “Jemaah Tabligh”, katak sira nia moris ne’e diak liu hotu ona ne’e mak sira hakarak oferese sira nia-an ba iha relijiaun hodi hakbesik ba Maromak no sira hakarak mai fahe esperiensia ka formasaun kona ba Relijiaun Islamika hodi prepara ba loron “Idul Ahdah” sidadaun sira ne’e laos husi Nasaun Pakistaun deit maibe husi nasaun Indonezia, Malaysia ho Oman”, salienta reprezentante musulmanu ne’e.

Relasiona ho informasaun ne’ebe espalla iha públiku ne’e, Vice-Ministu Interior rekoñese katak nia gainete simu duni pedidu autorizasaun ida konaba vizita grupu Jemaah Tabligh nian iha Timor-Leste.

“komunidade Musulmanu Timor-Leste hatama pedidu ofisiál mai iha ministeriu interior  iha loron 16 Maio 2023 hodi autoriza sira atu mai, atu nune’e sira bele halo aktividade relijiaun nian iha timor-leste no sidadaun sira ne’e mai bebeik ona iha Timor, maibe Hau hare iha media sosial hatete dehan ema sira ne’e terorista, entaun ami nia Servisu imigrasaun mos halo kedas kordenasaun  no kontaktu ho embaixada Indonezia iha Díli relasiona ho rumoris sira ne’e no sira hatan dehan sira lahetan alerta husi informasaun sira ne’e”, informa Antonio armindo.

Nia afirma katak sidadaun sira ne’e mai tamba iha pedidu ofisial husi sira nia reprezentante musulmanu iha Timor, mai hodi tau matan ba sira realiza aktividade sira ne’ebe durante sira nia sarani hala’o no sei kontinua halo aktividade iha munisipiu.

Membru governu ne’e mos informa ba parte siguransa hodi asegura sidadaun hirak ne’e nia atividade durante estadia iha Timor-Leste.

Reportajem: Eva Ximenes.

 4,244 Tatal Lee,  1 Views Today