Díli, yokalaumedia.com (12/07/2023)-Ministru Interior (MI) Francisco Guterres hateten IX governu sei hari’i Sentru Evakuasaun ba fatin-fatin sira ne’ebe mak hetan dezastre Naturais no tenki identifika fatin sira ne’e.

“agora dadaun Ita sei identifika fatin evakuasaun ba vitima afetada ba dezastre Natural”, hateten Ministru Interior, Francisco Guterres, iha resinto Palasio Governu, kuarta-feira (12/07), bainhira partisipa iha Konsellu Ministru hodi debate konaba programa governu nian molok lori ba parlamentu nasionál.

Membru IX governu ne’e mos haktuir katak estabelesimentu fatin evakuasaun ne’e importante tanba durante ne’e ekipa resgate sira evakua de’it vítima sira ba fasilidade públika sira.

“Ita hare fatin Eskola no Igreja ne’ebe di’ak, ita evakua vítima sira ba iha ne’eba ho provizoriu nune’e ita bele fasilita apoiu umanitariu hodi rezolve problema diário (apoiu nesesidade bázika) atu auguenta ba sira nia moris”, sublina Ministru Interior ne’e.

Governante ne’e profunda liu tan katak Governu sei rehabilita vítima sira nia uma ne’ebe mak hetan estragus

“Agora daudaun ami nia ekipa protesaun Sivil iha hela tereinu hamutuk ho polisia no lider komunitáriu sira hodi fo apoio nafatin vítima afetadu sira”, tenik Francisco Guterres.

Fo hanoin fali katak tuir dadus husi Autoriedade Protesaun Sivil, komunidade nia uma ne’ebe hetan estragu durante inísiu jullu ne’e no ema na’in 4 mak lakon ona vida.

Reportagem : Eva Ximenes

 2,938 Tatal Lee,  1 Views Today