Díli, yokalaumedia.com (14/07/2023) – Ministru Interior (MI), Francisco Guterres, hala’o vizita ba Diresaun Nasionál Servisu migrasaun  ne’ebe hala’o  servisu iha pontu entrada sira hanesan Aeroportu Internasionál Prezidente Nicolau Lobato Komoro ho Portu Tibar hodi haree besik liu tan servisu pessoal migrasaun nian no observa kondisaun fatin servisu sira.

“ita tenki kria kondisaun ida ne’ebe di’ak atu fo atendimentu ida ne’ek no adekuadu ba vizitante sira, ne’ebe signifika katak servisu imigrasaun diak duni hodi hatudu  imajen ne’ebe diak ba mundu no Ita mos tenki hatudu katak estadu ida ne’e iha duni servisu migrasaun ida ne’ebe diak no profisionál hodi servi ita”, hateten Ministru Interior, Francisco Guterres, iha Portu Tibar, Kuinta-Feira, (13/07/2023).

Vizita ne’e mos atu observa direta mos problema falta fasilidade balun ne’ebe bele prejudika servisu pessoal sira nian.

Ministru Interior mos aprofunda liu tan katak nia sei tau pessoal servisu migrasaun iha fatin ne’ebe di’ak bainhira aeroportu Internasionál Nicolau Lobato konklui ona nia prosesu rehabilitasaun.

“Agora ita labele halo buat ida iha Aeroportu Internasionál Nicolau Lobato tamba sei iha hela faze rehabilitasaun no bainhira remata ita sei husu imigrasaun nia fatin hodi atende vizitante ho di’ak no ohin hau fo hela instrusaun ba sira hodi reativa fali fatin sira ne’ebe foin lalais instala ne’e ho lais nune’e bele atende ema ho lais”, hakle’an Francisco Guterres.

Alem de vizita iha Aeroportu, governante ne’e mos hala’o vizita ba Portu Tibar hodi motiva no enkoraja pessoal Migrasaun iha fatin refere.

Franscisco Guterres husu atu kontinua servisu ho di’ak no responsabilidade nafatin, maske atividade komersiál seidauk la’o ho máxima.

Tuir programa IX governu nian katak Ministériu Interior sei tau prioridade mak kontinua profisionaliza PNTL, kontinua hadia servisu Migrasaun, rezolusaun konflitu no inklui servisu intelijénsia.

“ami (IX governu) iha programa prioridade mak Servisu migrasaun, Rezolusaun ba Konflitu no Intelijensia, iha rezolusaun ba konflitu sira hanesan sensibiliza sidadaun liu husi edukasaun sívika, halo mundansa mentalidade, halo mediasaun iha komunidade nune’e bele redúz konflitu iha baze no servisu siguransa seluk–seluk tan ami presisa hare hotu, inklui mos servisu Intelijensia, Investigasaun kriminál ha’u tenki foku para servisu ne’e la’o ho di’ak”, hakotu governante.

Reportagem : Eva Ximenes.

 1,627 Tatal Lee,  1 Views Today