Díli, yokalaumedia.com (31/07/2023) – komando PNTL iha loron sexta-feira (16/06/2023) liu ba despede ona membru PNTL 158  husi instituisaun seguransa ne’e tanba kompleta ona tinan 60, idade reforma nian, iha sentru formasaun polísia nian  (CFP-Sigla Portugues) Comoro-Díli, maibe IX governu konstituisionál, liu husi ministériu Interior, espesifikamente Gabinete Asesór Jurídiku hahu rejista fali membru Polísia Nasionál Timor-Leste (PNTL) hirak ne’e hodi hala’o fali servisu.

Eis Komisáriu PNTL, Paulo de Fátima Martins, atuál asesór Jurídiku iha gabinete Ministru Interiór nian deklara  IX governu nia interese atu kansela desizaun komandu Jerál PNTL hodi re-ativa fali sira nia salariu iha fulan Juñu no Jullu nune’e bele kontinua sira nia funsaun hanesan membru polísia.

“agora ami hahu rejista fali membru PNTL reformadu nain 158 atu tama fali servisu, depois re-ativa fali sira nia salariu fulan Juñu ho Jullu nian no iha faze dahuluk,  sei bolu uluk membru sira husi Munisípiu lima ne’ebé besik depois mak sira ne’ebe husi munisipiu dook”, Dehan Paulo Martins ba Jornalista sira iha sentru formasaun Akademia Comoro, Segunda-feira (31/07).

Munisípiu lima ne’ebe besik mak Díli, Liquiça, Ermera, Aileu no Manatutu, no tuir fali mak musipiu Covalima, Bobonaru, Ainaru, Manufahi, Baucau, Lautem, Viqueque no Rejiaun Administrativa Espesiál Oecusse Ambeno (RAEOA).

Asesór Jurídiku infroma tan katak membru reformadu hirak ne’e sei prense fali formulariu rua, mak deklarasaun retira fali dokumentu ne’ebé mak sira asina ona no ida seluk mak deklarasaun reintegra ba PNTL hodi hala’o fali kna’ar hanesan baibain.

“gabinete Ministériu Interiór halo hela servisu hahu rejista ona membru PNTL reformadu sira ne’e,  inklui sira ne’ebé moras permanente iha uma la halo servisu, to’o loron 03 fulan Agostu hafoin aprezenta ba ministru interior hodi hetan apresiasaun iha konsellu ministru molok membru hirak ne’e re-integra ba servisu”, informa nia.

Diretór Ezekutivu Fundasaun Mahein, Nelson Belo, entretantu, konsidera desizaun ne’ebe mak ministériu interior asume ne’e nu’udar desizaun polítika, la’os desizaun jurídika no konsidera mos katak desizaun Komando PNTL nian ne’ebe reforma membru sira ho tinan 60 ne’e tuir dalan legál.

“desizaun ne’ebé komandu jerál PNTL foti bazeia ba publikasaun iha jornál da repúblika iha oitavu governu nia mandatu, maibe iha IX governu hakarak re-ativa fali reformadu PNTL na’in 158 ne’e laos kestiona legalidade, maibe ida ne’e desizaun polítika entaun lei sira ne’e labele funsiona”, dehan nia.

Diretor ne’e mos husu ba IX governu atu altera lei de reforma ba PNTL nian, bainhira tuir ona desizaun polítika ne’ebe toma husi Ministériu Interior, atu nune’e komando PNTL  la’o tuir molok halo fali reforma iha futuru.

Reportagem : Mario da Cruz (kontributór) & Eva Ximenes (Revizora)

 2,361 Tatal Lee,  1 Views Today