Díli, yokalaumedia.com (10/08/2023) – IX gonernu liu husi reuniaun Extraordináriu Konsellu Ministru ne’ebe hala’o iha Palásiu Governu, Kinta-Feira ne’e, aprova Orgánika Ministériu Defeza ne’ebé aprezenta husi Ministru Defeza, Komodoru reformadu Donaciano do Rosário Gomes “Pedro Klamar Fuik”. No define mos Ministériu Defeza nu’udar departamentu governamentál ne’ebé responsavel ba konsesaun, ezekusaun, koordenasaun, avaliasaun polítika, ne’ebé define no aprova ona husi Konsellu Ministrus, ba área defeza nasionál no kooperasaun militár.

Iha reuniaun ne’e mos aprova proposta sira ne’ebé aprezenta husi Ministru Defeza, Komodoru reformadu Donaciano do Rosário da Costa Gomes “Pedro Klamar Fuik” no delibera ona, atu haruka ba Prezidente Repúblika hodi hetan aprovasaun:

Tuir komunikadu Imprensa ne’ebe yokalaumedia.com asesu katak Proposta nomeasaun Coronel Domingos Soares “Dobu”, nu’udar Komandante Komponente Terrestre F-FDTL; no Propostas promosaun ba:

Brigadeiru-Jenerál Américo Ximenes “Sabika Besi Kulit” ba postu Majór-Jenerál; Brigadeiru-Jenerál Cornélio Ximenes “Maunana” ba postu Majór-Jenerál; Brigadeiru-Jenerál João Miranda “Aluk Descartes” ba postu Majór-Jenerál; Koronél José da Costa Soares “Trix” ba postu Brigadeiru-Jenerál; no Kapitaun Mar e Guerra Higino das Neves ba postu Komodoru hodi substitui Komodoru reformadu Donaciano do Rosário Gomes “Pedro Klamar Fuik”, atuál ministru defeza.

Entretantu, deliberasaun ida ne’e válidu bainhira promulga ona husi Prezidente Repúblika, José Ramos Horta.

Iha reuniaun konsellu ministru, kinta feira ne’e mos governu aprova projetu Dekretu-Lei, ne’ebé aprezenta husi Gil da Costa Monteiro “Oan Soru” ko’alia konaba Orgánika Ministériu Asuntus Kombatentes Libertasaun Nasionál no aprova mos projetu Dekretu-Lei, ne’ebé aprezenta husi Ministru prezidénsia Konsellu Ministrus, Agio Pereira, kona-ba Pagamentu Suplementár ba funsionárius, ajentes no kontratadus ho termu sertu iha Imprensa Nasionál Timor-Leste, IP (INTL), ne’ebé halo serbisu impresaun boletins votu ba eleisaun parlamentares tinan 2023, ne’ebé hala’o iha loron 21 fulan-maiu liubá.

Reportagem : Eva Ximenes & Joanito Rangel

 1,057 Tatal Lee,  1 Views Today