Díli, yokalaumedia.com (17/08/2023) – Primeiru-Ministru, Kay Rala Xanana Gusmão husu ho lian maka’as membru Polisia Nasionál Timor-Leste (PNTL) hotu atu hala’o knaar tuir deit artigu 147 Konstituisaun RDTL ne’ebe hateten polisia ho forsa seguransa tenke defende legalidade demokratika no garante seguransa interna ba sidadaun hotu no la inklina ba partidu politika ka grupu ruma.

Polisia mós hala’o knaar ba prevensaun krime tenke bazeia ba respeitu direitus humanus no lei maka determina regra no regulamentu ba polisia no forsa seguransa no forsa sira seluk.

PM Xanana hato’o mensajen ne’e relasiona ho oknum komandante no membru polisia hamutuk nain 56 hosi unidade balun halo juramentu ba partidu politikus balun iha Timor-Leste.

“Ita mai hasoru malu, la’òs atu husu fó kastigu ba imi, maibé atu fo hanoin de’it katak, iha estadu direitu demokratiku tenki iha hanoin metin ida  atu orienta sira nia servisu, hanoin ne’e mak atu servi de’it povu ida ne’e, no rai ida ne’e. Polisia, forsa no instituisaun independente sira hanesan justisa labele sadere ba partidu ida”, alerta PM liu hosi mensajen iha formatura ne’ebe hala’o iha Sentru Formasaun Akademia PNTL Komoro, Dili.

Líder rezistente ne’e mos esplika liu tan katak la bandu atu agente polisial sira hili kualker partidu bainhira to’o nia tempu.

“Idak-idak nu’udar sidadaun bele iha ninia eskola, nia hili ida ne’ebé, nia gosta ida ne’e, no nia fiar ida ne’ebé, maibé polisia no forsa labele, abertamente tama iha partidu, tama iha politika, tanba presiza tebe-tebes independensia iha instituisaun sira ne’ebé defende povu tomak”, esplika Xanana Gusmão.

Xanana dehan, governu sei la fó kastigu ka hasai  oknum sira ne’ebé halo ona juramentu, maibé husu atensaun ba sira  hotu atu muda sira nia mentalidade no mantein dixiplina no serbi deit maka povu RDTL.

PNTL no F-FDTL maka liman kroat povu no estadu nian, forsa rua ne’e hamutuk atu servi povu la hare ba kor, religiaun ka grupu partidu politikus.

“Atu povu bele fó fiar ba ajente de polisia nomos forsa militár sira, ita tenki hatudu  ba públiku katak, imi nia misaun atu serbi no atu proteze, ne’e misaun ida sagradu”, nia reforsa.

Komandante Em-Xefe das FALINTIL ne’e afirma tan katak, Governu sei husu responsabilidade ba komandante PNTL hotu atu hadi’a komportamentu membru sira nian.

“Ha’u sei tau matan ba imi nia hahalok sira, hahú ohin ba oin maka buat ruma sala nafatin, ka lao la di’ak, ha’u sei bolu, ita boot la merese iha polisia, ba tama partidu la iha ema ida mak impede,tanba ita mai iha ne’e la’òs atu hamoe imi, maibé ita hamutuk hodi husu povu fó fali konfiansa ba imi, ohin ba futuru, ami nu’udar ajentes polisia, ami sei soe tiha foer ida ne’e, hodi hetan de’it misaun ida, misaun atu serbi, misaun atu proteje povu ida ne’e”, subliña Xefe Governu.

Iha oportunidade ne’e, Xefe Governu Xanana apela mos ba Komandu F-FDTL atu prepara rekursu hodi asegura ba rikusoin Timor iha tasi  laran, tanba governu dadaun ne’e foka hela atu dada mina hosi Greater Sunrise mai Timor-Leste.

Vizita Xefe Governu nian ne’e hetan akompañamentu husi Komandante Jerál PNTL, Komisáriu Jerál Henrique da Costa, Xefe Estadu Maiór Jenerál  F-DTL Tenente Jenerál Domingos Raul Falur Rate Laek, Ministru Interiór, Fransisco da Costa Guterres, Ministru Defeza, Pedro Klamar Fuik.

Reportagem : Eva Ximenes & Joanito Rangel

 699 Tatal Lee,  2 Views Today