Díli, yokalaumedia.com (22/08/2023) – VIII Governu konstituisionál liu husi Komando Jerál PNTL iha loron 16 Juñu tinan ne’e despede ona membru hamutuk 158 ne’ebe kompleta ona idade reforma, tinan 60 ba letan, bazeia ba publikasaun iha jornal da repúblika. Maibe, depoiz de formasaun no membru ba IX governu nian simu pose, kansela prosesu reforma ba membru polísia hirak ne’e. Desizaun ne’e toma husi Ministériu Interior ne’ebe lidera husi Franscisco Guterres.

Tanba ne’e, ministériu refere hahu prosesa hikas saláriu ba membru reformadu hirak ne’e, liu husi deklarasaun Ministru Interior nian bainhira partisipa iha aprezentasaun Proposta lei Orsamentu Retifikativu iha Parlamentu Nasionál, tersa-feira (22/08) ne’e.

“Saláriu husi polísia reformadu sira nian, agora prosesu la’o ona no ha’u hakerek ona karta ba komando jeral hodi reativa polisia reformado sira nia salariu ne’e no ha’u mos seli lori ba konsellu ministru hodi deskute tanba presija reforma no harmoniza base legal sira ne’ebe regulariza prosesu reforma ne’e rasik”, hateten Francisco.

Francisco mos esplika katak polisia reformado sira nia salariu reativa hahu husi sira nia servisu ne’e no sei ba aprezenta iha konsellu ministru.

“Ami presija hadi’a lei no estatutu sira, depois de ida ne’e mak ami ba aprezenta iha konsellu ministru iha fulan setembru nia laran tanba ita presija kria kondisaun espesial ida ba sira molok ba reforma, atu nune’e membru polísia sira bele reforma ho dignu tamba nia servisu ho di’ak, dedika an ba polísia, instituisaun estadu, ba servi nasaun ida ne’e, kuandu tama reforma estadu tenki onra no agradese nia servisu ida ne’e”, haktuir Governante.

Nia aprofunda liu tan katak kondisaun hirak ne’e governu presija kria atu nune’e membru sira ne’ebe pasa ona ba reforma ne’e mantén nafatin lasu amizade instituisaun hodi kontinua ajuda estadu ida ne’e ba estabilidade no siguransa iha ita nia rai laran.

Reportagem : Eva Ximenes

 1,267 Tatal Lee,  1 Views Today