Díli, yokalaumedia.com  (11/09/2023) – Prezidente Repúblika, José Ramos Horta, fó pose ba Membru Foun Konsellu Estadu no Membru Foun ba Konsellu Superior Defeza no Seguransa nian (KSDS), iha Palasiu Prezidente, Ai tarak laran.

Konsellu Estadu hanesan orgaun konsultivu Xefe Estadu nian ba asuntu polítiku, bazeia ba Konstituisaun RDTL artigu 90 no 91. No Konsellu Superiór Defeza no Seguransa hanesan orgaun konsultivu Prezidente Repúblika nian ba asuntu defeza, seguransa no soberania, bazeia ba Konstituisaun RDTL artigu 148.

Membru foun Konsellu Estadu nian hamutuk sanulu resin haat mak hanesan Prezidente Parlamentu Nasionál, Maria Fernanda Lay; Primeiru-Ministru, Kay Rala Xanana Gusmão; Ex-Prezidente Repúblika, Major-Jeneral ref. Taur Matan Ruak; Ex-Prezidente Repúblika, Dr. Francisco Guterres Lú-Olo, Membru na’in lima nomeadu husi Prezidente Repúblika mak Abilio da Conceição de Araujo, Maria Domingas Fernandes Alves “Mikato”, Tenente-Jeneral ref. Tito da Costa Cristovão “Lere” Anan Timur, Madre Guilhermina Marçal no Milena Pires. Membru na’in lima seluk nomeadu husi Parlamentu Nasionál mak Virgilio Smith “Cranek”, Jacinto Viegas Vicente “Roke”, Nominando Martins “Buras”, Ricardo da Costa Ribeiro no Josefa Alves Pereira Soares.

Membru foun ba Konsellu Superiór Defeza no Seguransa hamutuk na’in sanulu resin tolu mak hanesan Primeiru-Ministru, Kay Rala Xanana Gusmão, Ministru Negosius Estranjeirus no Kooperasaun, Bendito dos Santos Freitas, Ministru Defeza, Contra-Almirante Donaciano do Rosário Gomes, Ministru Interiór, Francisco da Costa Guterres, Ministru Justisa, Amândio de Sá Benevides, Reprezentante Parlamentu Nasionál Deputada Maria Terezinha da Silva Viegas, Deputadu David Mandati Dias Ximenes no Deputadu Duarte Nunes; Chefe Estado Maior Generál das F-FDTL, Tenente-General Falur Rate Laek; Komandante Jerál PNTL, Komisáriu Jerál Henrique da Costa; Diretór Jerál Servisu Nasionál Intelijénsia, Longuinhos Monteiro, Júlio Tomás Pinto no Nuno Manuel Corvelo de Andrade Sarmento (Nomeadu husi Prezidente Repúblika).

Hafoin fó pose ba membru foun sira, Prezidente Repúblika kontinua kedas ho lidera reuniaun ba dahuluk hamutuk ho Membru konsellu rua hodi ko’alia kona ba funsaun membru sira nian bazeia ba lei no rejimentu sira.

Membru Konsellu Estadu hamutuk na’in sanulu resin haat no Konsellu Superior Defeza no Seguransa hamutuk na’in sanulu resin tolu sei halao sira nia mandatu durante tinan lima.

Reportagem : Eva Ximenes

 4,280 Tatal Lee,  2 Views Today