Díli, yokalaumedia.com (20/09/2023) – Komandu Polisia Nasional Timor-Leste (PNTL), loke ona prosesu investigasaun ba kazu ne’ebe deskonfia membru Ajente Xefi Polisia Inisial DJSP tiru kanek vitima Julivio Pereira Bruno iha Aldeia Bidik, Suku Akadiru-Hun, Postu Administrativu Nain Feto, Munisipiu Dili, tan perturba ordem públiku bainhira iha tempu kalan.

Superintendente Polisia António da Luz, Porta-Voz Komandu Jeral (PNTL), hateten kazu ne’e envolve membru Polisia ida ho deviza ajente xefi DJSP.

Porta-Voz ne’e mos klarifika liu tan katak kazu ne’e akontese tanba Joven sira iha bairu laran halo baruillu iha kalan bo’ot, hahu iha tuku 22:00 to’o fali tuki 03:00 dader madrugada hodi perturba komunidade sira nia deskansa iha tempu kalan nune’e membru PNTL ajente xefi DJSP, sai ba hodi hakalma situasaun hodi hateten ba joven sira ne’ebe halo barullu atu nonok tanba ema seluk hakarak atu deskansa, maibe vitima Julivio Pereira Bruno hamri’ik halo insultu hasoru kedas suspeitu.

“bainhira vitima halo insulta hasoru ho liafuan tolok, depois atu baku tan suspeitu ajente xefi polisia DJSP, depois suspeitu sente vitima uza forsa atu baku suspeitu,  tanba ne’e nia tiru sae dala ida uluk fo atensaun, maibe vitima kontinua uza forsa atu baku, tanba ne’e membru Polisia Ajente xefi inisial DJSP foti asaun tiru konaba vitima nia ain parte karuk rezulta tohan”, konta Superintendente António da Luz, iha komferensia imprensa iha kuartel jeral PNTL kaikoli, Dili(18/09). .

Tuir reprezentante Komando Jeral ne’e katak PNTL liu husi Polisia investigasaun to’o kedas terrenu hodi asegura suepeitu no lori kedas DJSP  ba detén iha sela Polisia – kaikoli.

“Kazu insidente tiru ne’e agora nia prosesu investigasaun lao hela ita rejista ona numeru uniku krime NUK: 0256/23. PNSIK, tanba ne’e suspeitu sei kumpri oras 72 kontinua aprezenta ba Ministeriu Publiku atu submete ba interrogatoriu dahuluk iha tribunal tuir lei ne’ebé vigora iha Timor-Leste”, dehan António.

Prosesu investigasaun kontinua la’o hodi halibur faktu sira relasiona ho motivu akontesimentu refere.

“orsida iha prosesu nia laran ne’e mak foin bele haree nia grau konaba utiliza armas ne’ebé atribui ba sira membru polisia sira ne’e no tanba ne’e prosesu investigasaun, entrega ona ba iha Departamentu Investigasaun Kriminal Nasional (DIKN) atu halo prosesu tomak depois rezultadu sei informa ba públiku bele hatene konaba regra uza arma tiru kanek vitima ne’e”, afirma da Luz.

Relasiona ho akontesimentu ne’e, Lucia Cecília, vítima nia kaben, fo sasin katak molok kazu tiru ne’e akontese, Julivio duni nia kolega sira atu fila ba idaidak nia uma tanba nia kolega sira hahú barullu, ho lian maka’as nune’e DJSP hanoin Julivio hakilar nia.

“pesoal polisia ne’e hakat mai uma, hafoin rona Julivio nian no hahú diskuti-malu. Julivio mós halo asaun hodi dudu pesoal polisia ne’e. Tanba emosaun, pesoal polisia ne’e losu pistola no tiru ba leten. La to’o ne’e de’it, nia mós se pistola ba Julivio nia ain no hahú buti gatilu. Bala semo sai hodi borus Julivio nia ain karuk no tama iha ninia ain-kabun kuanan”, konta Lúcia Cecília.

Enkuantu, DJSP haktuir iha katak iha momentu ne’ebá, Juvilio ho nia kolega sira hemu tua, barullu no hakilar no hodi tolok DJSP nia kaben . Juvilio ho nia grupu mós hakarak asalta hodi baku DJSP ho nia feen tanba ida ne’e mak DJSP deside  tiru.

Diretor Fundasaun Mahein (FM), Nelson Belo, relativamente ho kazu ne’e, husu PNTL iha Departamentu justisa atu bele halo prosesu investigasaun ho kle’an.

“kazu ne’e iha infrasaun bo’ot, bele forma ekipa eh komisaun independente ida para halo investigasaun atu hatene ho serteza PNTL tiru joven tuir regra ne’ebé hakerek iha dekretu lei numeru 43/2011 konaba rejime juridiku uza forsa nian ka lae, tanba iha lei ne’e hateten uza forsa ne’e rekursu ikus”, esplika Nelson Belo.

Reportagem : Joanito Rangel

 4,193 Tatal Lee,  1 Views Today