Díli, yokalaumedia.com (25/09/2023), Komandante interinu Unidade polisia Fronteira, Superintendente Assistente Carlos Moniz Maia, hateten situasaun iha area fronteira kontroladu, maske kontinua iha ultrapasa fronteira ho ilegal ne’ebe komete husi sidade husi rai rua.

“loron-loron kontinua iha atividade ultra pasa liña fronteira ho ilegal, atividade negosiu ilegal, maske nune’e Unidade Patrulhamentu Fronteira (UPF), hanesan forsa seguransa ne’ebe tau matan ba liña fronteira nafatin  hala’o nia kna’ar patrullamentu hodi kaptura no prende ema hirak ne’e nia sasan sira ne’e”, haktuir Komandante interinu Unidade polisia Fronteira, superintendente Assistente Carlos Moniz, hafoin enkontru, iha salaun Laline Larhigutu, segunda-feira, (25/09).

Komandante ne’e mos salienta liu tan katak timor-oan dalabarak mak hola sasan husi Indonézia tanba folin baratu liu kompara ho Timor.

“komunidade sira hola sasan iha parte sorin ne’e tamba nia presu diferente iha ema nia rain ho ita nian, nia presu diferente bo’ot sira halo ida ne’e tamba livre husi taxa ho nune’e nia lukru ne’e maka’as. Alein de ne’e iha mos timor-oan ne’ebe fa’an  OB (roupa uzadu) husi rai laran ba ne’eba, sira ne’e mak ita kaer bebeik husi ita nia rain tenta hodi ilegal liu husi liña fronteira ba iha Atambua”, informa Carlos.

Komandante UPF ne’e mos rekoñese katak sidadaun sira halo atividade ne’e tanba nesesidade, maibe UPF kontinua aplika regra no sansaun ba ema hirak ne’ebe tenta tama-sai ilegalmente iha rai ketan Indonézia no Timor-Leste.

Nia mos haktuir katak UPF hala’o ona nia kna’ar bazeia ba artigu 78 husi lei organika ninian hateten halo movimentu, asegura no apoiu autoridade sira seluk-seluk iha liña fronteira hodi kontrola liña fronteira.

Reportagem : Eva Ximenes

 5,310 Tatal Lee,  3 Views Today