Díli, yokalaumedia.com (02/10/2023)- Komandu Geral PNTL realiza formatura ida hodi haruka membru hamutuk na’in 34 husi Munísipiu no mos Unidade Espesial da Polisia, atu destaka tan ba iha fronteira hodi nune’e reforsa liu tan, seguransa sira iha area fronteira, entre Indonezia ho Timor-Leste nian.

“Hare’e ba relatóriu, fulan hira ba kotuk, sasan tama sai ka kontra-bandu ne’e barak, entaun hirak ne’e maka halo ita presiza reforsa ba iha ne’eba. Difikuldade ida limitadu liu ne’e maka, foin dadaun rekursu humanu no transporte ninian, entaun ita laiha kbi’it  rezolve dala ida de’it, maibé ita reforsa uluk ita nia forsa sira, ba oin maka ita hare’e fila fali hodi apoia tan transporte balun para sira movimeta no kontrola; tantu kareta no motorizada, mas karik fín de 2023 ne’e maka ita la konsege responde nesesidade hirak ne’e, ita sei tau atensaun ba orsamentu 2024 ninian bele sosa transporte sira asegura ita nia ema sira iha fronteira ne’ebá”, hateten, Komissáriu Jerál Polísia, Henríque da Costa iha Komando Jerál Kaikoli Díli Timor-Leste, (02/10) ne’e.

Aliende ida ne’e, nia mos husu ba 34 ne’ebé atu destaka ne’e, nafatin hare’e ba regra, legalidade karik sira nia vida hetan ameansa ka ema seluk nia vida hetan ameansa maka utilizsaun arma ne’e ultimu rekursu ona.

“Serbisu iha fronteira ne’e, ita la’os hasoru ita nia ema rai-laran de’it, maibé ita mos hasoru sidadaun sira husi rai seluk, entaun ita husu atilizasaun armas ne’e, nafatin hare’e ba regra, ita nia legalidade nian, iha ne’ebá dalan barak ita rezolve, kuandu utilizasaun armas ne’e sai ultimu rekursu ona katak sira nia vida ameansa ka ema seluk (komunidade) nia vida ameansa, entaun laiha ona dalan para halo negosiasaun ka laiha solusaun, entaun tenki dalan ida ne’e, mas ita mos lakoi halo ita nia povu sai paniku ho buat sira ne’e, ho nune’e Komandante Unidade Espesial sei prepara formasaun baziku ba sira ne’ebé ita destaka, nune’e sira hodi komprende no hatene molok tun ba iha ne’ebá,” esplika Komissáriu.

Komissáriu Gerál ne’e deklara liu-tan katak, total 34 ne’e, sira serbisu durante fulan rua iha fronteira, sei haruka sira fila-fali, para sira seluk troka fali. Portantu despaixu ne’e fo ona ba Komandante Munísipiu sira mantein prepara hela sira nia ema, hodi nune’e troka fali hirak ne’ebé maka durasaun serbisu remata.

Entretantu, atu destaka seguransa sira ne’e ba iha area sira mak hanesan Munísipiu, Covalima, Bobonaro no regiaun autótomu Oe-Cusse.

Reportagem: Cedelizio do Rêgo

 2,990 Tatal Lee,  1 Views Today