Díli, yokalaumedia.com (10/10/2023)- Polísia Nasionál Timor-Leste (PNTL)  Reformadu nain 158 Reintegra fila fali ba instituisaun PNTL liu husi rezolusaun IX governu konstitusionál Nº. 43/2023 4 de outubru, ne’ebe ko’alia konaba “reativação do pessoal com funções policiais da Polícia Nacional De Timor-Leste”.

Komandante Pesoál Formasaun Superintendente Xefi, Arquimino Ramos esplika katak membru Reformadu sira sei ativu fali hanesan bai-bain.

“sira ne’ebé antes ne’e servisu iha komandu jerál, komandu Munisípiu Díli no sentru formasaun nian, tuir despaxu komandu jerál nian sira sei mai fali iha Sentru Formasaun Polísia, hodi transmite kuñesimentu ne’ebe sira Iha ba ita nia membru sira, no sira seluk ne’ebe iha munisípiu sei ba fali komandu  ne’ebe antes ne’e sira servisu ba”, esplika Arquimino Ramos, iha CFP komoro, segunda-feira (09/10).

Arquimino Ramos afirma katak tuir rezolusaun governou nian saláriu ba membru reformadu sira hahu relativa fila fali hahu husi fulan-Julho to’o mai agora.

” ita sei komunika ho institutu Nasionál Siguransa Sosiál (INSS) hira mak sira simu ona no diskonta ida ne’ebe sira simu ona ne’e, restu ne’ebe sira seidauk simu ne’e sira iha direitu atu simu no mos subsídiu Polísial no alimentasaun nian hahu  husi Julho to’o mai Setembru tuir rezolusaun governu ne’e hatete“, afirma Arquimino.

Iha fatin hanesan reprezentante  Polísia  Reformadu, Superintendente Xefi Carlos Jerónimo, hato agradese ba ekipa ne’ebe sevisu hamutuk ho IX governu konstitusionál hodi reintegra fali sira ba Instituisaun.

“ hakarak lori membru 158 nia naran agradese ba ekipa ne’ebé ho esforsu tomak hala’o servisu  ida-ne’e ho IX governu konstitusionál hodi Reintegra fali ami mai PNTL “, haktuir Carlos Jerónimo.

Reportagem:Joanito Rangel

 8,386 Tatal Lee,  2 Views Today