Bobonaro, yokalaumedia.com (06/11/2023) – Primeiru-Ministru, Kay Rala Xanana Gusmão akompaña hosi Autoriedade Munisipal, lokal no Komandante PNTL Bobonaro, observa direta situasaun seguransa no kondisaun komunidade nian hafoin akontesimentu konfrontu iha Lourba no Carabau iha Bobonaro foin lalais ne’e.

Habitante suku rua ne’e hamonu matabeen bainhira simu prezensa Xefe Governu nian, iha ne’ebe maioria labarik mak sai vítima, husi konfrontu entre jovem sira husi suku rua ne’ebe deskonfia mos envolve iha grupu arte marsial no Grupu Arte Ritual. Ema na’in 7 mak hetan kanek no Uma komunidade nian 8 mak hetan sunu no balun hetan estragu durante konfrontu ne’ebe akontese iha loron sexta-feira (03/11/2023) lokoraik too kalan.

Durante vizita, Xefe Governu Xanana mos halo diálogu ho sidadaun sira no hateten ho hirus hodi promote ba populasaun sira katak, iha semana ne’e, Governu liu hosi Reniaun Konsellu Ministru sei hasai rezolusaun ida hodi taka atividade Arte Marsiál (GAM)  no Grupu Arte Rituál (GAR).

“Ha’u dehan ba imi, Konsellu Ministru sei deside atu taka kedas atividade Arte marsial no Arte Rituál, tanba ha’u la permite, se povu ne’e funu no mate iha funu laran, agora ita ukun aan, joven sira mosu mai oho malu bebeik, ida ne’e sei la akontese tanba ne’e, Governu sei halo rezolusaun ida ho baze ne’ebé forte atu taka atividade treinu GAM ho GAR labele kontinua hamosu krime iha fatin publiku”, dehan PM Xanana durante dialogu.

Iha fatin hanesan, Xefe Suku Lourba, Lino da Cruz agradese ba PM Xanana bele too direita hodi rona informasaun no buka solusaun rezolve problema ho dalan dialogu, inklui lori apoiu umanitaria ba vitima afetadu sira.

“akontesimentu  ne’e halo pupulasaun lubuk ida mak halai ba subar iha ailaran no balun ba hela ho familia iha Postu Bobonaro Vila no Maoria uma sira ne’ebé hetan sunu ne’e na’in ba ferik katuas no oan kiak sira”, nia hatete.

Xefe suku ne’e husu ba goveru, atu apoiu nesidade bazika ba vitima sira, no apoia fasilidade hodi hadia hikas komunidade nia uma ne’ebé hetan estragus no husu ba Komandu PNTL no F-FDTL hodi harii postu seguransa iha Lourba hodi fo seguransa ba povu atu moris ho hakmatek.

Hafoin hala’o dialogu, PM Xanana ne’ebe akompañadu husi nia oan mane Kay Olok Gusmão fahe apoiu ba vitima sira no observa mos uma sira ne’ebe mak hetan sunu durante akontesimentu refere.

Suku Lourba kompostu hosi Aldeia haat, hanesan Sordoli, Lourba Leten, Jobelis no Gumer dadaun ne’e hetan seguransa makas hosi Komandu PNTL no F-FDTL.

Hafoin vizita Lourba, Xefe Estadu mos hakat liu ba Suku Carabau hodi hasoru komunidade no realiza diálogu ho Carabau oan sira iha área merkadu suku refere.

Xefe Suku Carabau Manuel Noronha no Xefe Suku Cotaboot, Miguel Gonsalves aseita ho governu taka grupu arte marsiál no arte rituál hotu tanba konflitu mosu bebeik.

“Ami mós aseita atu taka tiha grupu arte marsiál ne’e, tanba ami mós lakohi terus”, nia hatete.

Hafoin rona tiha deklarasaun ne’e, PM Xanana husu atu Komandu PNTL investiga klean grupu rua ne’ebé envolve iha konflitu hodi realiza kedas dialogu para labele akontese bebeik konflitu no husu ba juventude sira atu halo reflesaun nune’e labele monu ba krime no labele sunu povu inosente sira nia uma.

“Apa, ama no liurai sira, ha’u mai hosi Loubar hateke ba mai too iha ne’e (Carabau) ha’u hakfodak, ami la’o haree uma balun sunu, estraga. Ha’u husu boot ba imi para ona atu estrega malu, tanba sira iha sorin Lourba, prepara atu imi bele ba dame malu”,PM apela.

Entretantu, Governu liu hosi Sekretaria Estadu Protesaun Sivil (SEPS) rekolla ona dadus ba vitima afeitadu hodi lori mós apoiu sasán baziku no sei oferese tan material kontrusaun ba vitima sira.

Vizita Xefe Governu ne’e hetan akompañamentu hosi Ministru Interior, Fransisco Guterres, Ministru Obras Publika, Samuel Marçal, Sekretáriu Estadu Protesaun Sivil (SEPS), Domingos Mariano Reis, Deputada Parlamentu Nasionàl, Maria Barreto no  Prezidente Komisaun Reguladora Arte Marisiál (KRAM), Octavio da Conceição “Anus” no veterans sira .

Reportagem : Eva Ximenes

 3,840 Tatal Lee,  2 Views Today