Díli, yokalaumedia.com (07/11/2023) – Komando Jeral PNTL Komemora loron Feto Nasional ho tema “Empodera Feto iha Instituisaun PNTL”, ne’ebe sai mos hanesan loron mate husi Saudoza Maria Tapo, iha Comoro Díli Timor-Leste.

Komisariu Jeral Polisia Henrique dos Santos esplika loron nasional feto ne’ebé Estadu deside tau iha Heroina Maria Tapo nia loron mate ne’e atu fó onra ba Feto hotu-hotu nia dedikasaun no aten barani hodi hamri’ik ho Mane sira funu kontra invazor durante tinan 24.

“loron 3 fulan novembru sai momentu impontante atu refleta kona ba papel inan feton sira iha prosesu empoderamentu ou dezenvolvimentu, ho ida ne’e instituisaun PNTL iha kompromisiu atu empodera feto iha aspetu oioin”, tenik Henrique.

Komandante PNTL ne’e mos aprofunda tan katak, komemora refere hodi valoriza feto sira, liu-liu feto sira iha PNTL tanba feto sira iha kapasidade di’ak hala’o serbisu iha instituisaun refere.

“Hakarak hateten katak Maria Tapo moris iha Bobonaro, hanesan feto simples ida maibé sai hanesan figura ezemplar ba Feto sira no hanesan Heroina dahuluk ba iha luta libertasaun Nasional, Maria Tapo nu’udár fe’en ida ne’ebé brani fó ezemplu ne’ebe apoia tebes nia kaben, hatudu ona iha dia 3 de novembru wainhira nia kaben ha’an hela nia troka nia kaben nia fatin hodi halo vizilansia iha liña de fogu iha Abrigu ho kilat iha liman, derepente inimigu halo asaltu, Maria Tapo aten brani foti asaun hodi reziste hasoru inimigu no hetan tiru no mate iha bataila”, Salienta Komisariu”.

Sekretária Estadu ba Igualdade (SEI), Elvina Sousa Carvalho hateten feto ohin loron presija banati kontribuisaun ne’ebé heroiña sira halo ona iha pasadu.

“Loron tolu fulan novembru, nu’udár loron ne’ebé mak  Governu deside atu bele fó onra ba Heroiña sira, liu-liu Maria Tapo no mos feto sira seluk nia korajén hodi bele kontribui ba iha ukun-an ida ne’e, kontribuisaun ne’ebé sira halo ona ho sira nia korajén, ohin ba oin ita hatutan”, hateten Elvina.

Governante ne’e mos fortifika katak, Sekretária Estadu no Liña Ministerial siura iha obrigasaun hodi asegura feto sira nia direitu ba asesu edukasaun no asuntu sira seluk tan.

“Governu liu husi SEI no liña Ministerial iha obrigasaun asegura feto iha direitu hodi asesu edukasaun tantu saida de’it. Hanesan membru komisaun B ba tinan lima, depois de la’o perkore iha Timor-laran tomak, ba iha postu UPF, husi Mota-ain Mota-masin ba postu sira observa katak feto ne’ebe sai membru PNTL hanesan vokasaun ne’ebe pronto servi, no ha’u hateten Femenina iha PNTL ne’e luar biasa estra-ordinariu”, hateten Elvina Sousa.

Komandante Timor-Leste Police Development Program (TLDPD), Darren Booy hateten ho kosolok katak komemorasaun refere fó hanoin hikas kona ba valor sira no kontribuisaun feto nian iha pasadu no nu’udár korajén atu nafatin firme iha kompromisiu hanesan Polisia.

Reportagem: Cedelizio do Rêgo

 3,503 Tatal Lee,  2 Views Today