Díli- yokalaumedia.com – 23/02/2024 – Polísia Nasionál Timor-Leste (PNTL) liu husi departamentu investigasaun Kriminal (DIC) servisu hamutuk ho ekipa Tékniku Ministeriu saúde, halo detensaun, aprensaun no buska ba Farmásia M F ne’ebé lokaliza iha kolmera tan komete Krime hasoru ekonomia tuir kódigu penál Timor-Leste nian

Informasaun ne’e fo sai husi komandante DIC, Superintendente Xefe João Belo dos Reis liu husi konferensia imprensa relasiona ho operasaun ne’ebé Diresaun Investigasaun kriminál halo iha loron 21 fevereiru tinan ne’e.

“husi mandadu ne’ebé ami hetan ami  halo buska ba instalasaun Farmacêutika MF hanesan,  armazém no mos ba kontentor rua ne’ebé foin tama iha portu tibar. Husi fatin hirak ne’ebé mak ami deteta katak MF viola Krime fraude Fiskál (art. 314. KP Timor-Leste ) , krime Bem ka merkadoria nia inportasaun no exportasaun ilísita(art. 315.KP Timor-Leste ), krimi kontrabandu (art. 316. KP Timor-Leste ) , krime deskamiñu (art.317 KP Timor-Leste ), krime falsifikasaun ba dokumentu ka notasaun téknika (art.303.KP Timor-Leste ) no falsifikasaun agravada(art.304. kódigu Penál Timor-Leste )”, esplika João Belo.

Portavós ne’e mos hakle’an liu tan katak iha prosesu  ne’e PNTL-DIC detein ona jerente Farmásia MF nain tolu no  halo mos apreensaun ba objetu Krime balun.

“mandadu ne’ebé iha ami detein Jerente nain tolu iha sela Polísia, nain rua nu’udar sidadaun Indonesia ho inisiál DIBS, JP no ida seluk nu’udar sidadaun Timor ho inisiál HDC.  Ami mos prende ai-moruk hamutuk  item 150 no oras ne’e daudaun ami asegura hela iha departamentu investigasaun kriminál  (DIK) no durante 72 horas Ami sei aprezenta ba ministériu públiku hodi enkamiña ba tribunál”, afirma Portavós.

Komandante ne’e mos esklarese katak Ai-moruk ne’ebé tama iha Timor-Leste tenki tuir autorizasaun ministériu saúde nian.

“ita asegura sidadaun sira nia direitu atu konsumu Ai-moruk, maibé ai-moruk sira ne’e atu tama iha ita nia rain teki tuir autorizasaun ministériu saúde nian, tamaba ministériu saúde iha lista kompletu ba ai-moruk sira ne’ebé nesesariu atu tama. Se la tuir saida mak ministériu autoriza maka Polísia Nasionál Timor-Leste sei halo intervensaun hodi labe fo impáktu ba saúde públika ema nian”, informa João.

Reportagem: Joanito Rangel.

 1,546 Tatal Lee,  1 Views Today