Dili-yokalaumedia.com-10/02/2023 – FALINTIL-Forsa Defeza Timor-Leste (F-FDTL) simu ekipa Forsa Armada husi Estadu Unidus Amerika (EUA) hodi hala’o ezersisiu Cooperation Afloat and Readiness Training (CARAT) konjunta, durante loron 5 iha Timor-Leste, liliu iha area maritima nian.

Enkaregadu Negosiu EUA iha TL  Tom Daley esplika katak forsa Marinha EUA hamutuk 800 to’o ona iha portu dili no prontu atu partisipa iha ezersisiu Cooperation Afloat and Readiness Training (CARAT) hamutuk ho F-FDTL, durante loron liman 5 iha Timor-Leste hodi bele troka matenek no hasae liu tan kapasidade exersítu sira nian konaba asitensia Umanitaria  iha TL.

“forsa naval timor-oan nain 100 mak sei partisipa iha ró leten halo ezersisiu hamutuk hodi uza Elikóperu kooperasaun luku nian iha tasi no hau fiar katak, timor-oan sei hetan kuinesimentu barak iha ezersisiu ne’e hodi nunee iha futuru bele kontrola área marítima rasik no mos bele fo asistensia ba dezastre ruma akontese iha TL,” dehan Tom Daley  iha estadiu, Dili, (10/02).

Membru Policia Nasional Timor-Leste mos sei partisipa iha ezersisiu refere hodi hakle’an mos kooperasaun entre Timor ho América iha área Seguransa no interopercionalidade iha área marítima no sei promove seguransa maritima rejionál nian mos.

Tom realsa liu tan katak militar EUA sira ne’ebé mak sei partisipa iha ezersísiu ne’e mak ekipa USS John P Murtha no Unidade Expedisaun Navál da-13, ne’ebé iha kapasidade ba hala’o operasaun ho eskala boot komesa husi misaun kombate too iha fó asisténsia umanitária no apoia iha tempu dezastre, Unidade mergulladora, Unidade Salvamentu númeru 1, Batallaun Konstrusaun Móvel Navál, no Eskuadraun Destruidór númeru 7. Realsa Daley.

Entretantu, Vise Xefi Estadu Maior Jenerál F-FDTL , Maijór Jenerál Calisto Santos “Coliati” hateten, Prezensa forsa armada EUA Bataillaun ida iha TL ne’e hanesan kontinuasaun na kooperasaun ne’ebe hala’o tiha ona dezde tinan 2019, hodi hametin kooperasaun bilateral forsa husi rai rua no fahe kuiñesimentu tekniku ho tatika ba ita nia exersítu sira, espesialmente ida área tasi nian.

 “Aktividade CARAT ne’e Timor-Leste mak sai hanesan uma-na’in no realiza tanba koopersaun bilateral entre TL ho EUA, no Lojistikamente servisu hamutuk entre EUA, Austrália, Nova- Zelandia ho Japaun no mos forsa armada Timor-Leste”, informa Coliati.

Reportagem : Kontributór

 256 Tatal Lee,  1 Views Today