Dili-yokalaumedia.com (14/04/2023)- lider arte-marsiál ezistente iha Timor-Leste asina deklarasaun dame ida iha Gináziu Díli kinta-feira ne’e ho objetivu atu hametin estabilidade nune’e bele fo susesu ba eleisaun ne’ebe sei akontese iha loron 21 fulan Maiu tinan ne’e.

Prezidente IKS-PTL, Silvestre Sufa, hanesan mos asinante ida husi paktu ba dame ne’e, husu ba membru Organizasaun Ikatan Keluarga Silat Putra Timor-Leste ()IKS-PTL) kera sakti  atu  hakmatek hodi kontribui ba paz no estabilidade seguransa iha momentu importante ne’ebe povu sei ba ezerse nia direitu hodi hili ukun na’in sira.

“liu husi asina akordiu ida ne’e ha’u husu ba joven sira ne’ebe inklina a’an iha IKS-PTL hotu-hotu tenki hakmatek hodi kontribui paz no dame ba eleisaun ne’e be sei akontese iha loron 21 Maiu tinan ne’e.  Se membru balun mak komete krime sei entrega ba autoridade polisiál hodi kriminaliza tuir dalan legal ne’ebe vigora iha ita nia rain”, haktuir Sufa.

Segundu komandante PNTL, komisáriu Predro Belo, esplika katak akordu refere sai hanesan meiu ida hodi hametin dame iha eleisaun.

“akordu ida ne’ebe ohin sira intrega ba PNTL hanesan provas ida hodi fo kompeténsia ba PNTL atu  investiga no prosesa membru OAM sira ne’ebe komete krime. No mos ami sei bolu líder arte marsiál sira atu sira bele responsabiliza ba asaun sira ne’ebe viola husi sira nia membru tuir akordu ne’ebe mak asina ona”, esplika Pedro Belo.

Prezidente Komisaun Nasionál Eleisaun, (CNE-silga Portuguéz), José Agostino Belo, husu nafatin ba entidade hotu atu garante estabilidade iha eleisaun.

“iha biban ne’e ha’u husu ba organizasaun arte marsiál sira atu kontribui mos ba estadu ida ne’e iha eleisaun ne’ebe sei akontese iha loron 21 fulan Maiu. No ha’u husu mos atu labele utiliza atributu OAM iha kampanha ne’e”, husu José Agostinho Belo.

Tuir kalendáriu husi CNE katak kampanha eleitoral sei hahu iha loron 19 fulan ne’e to’o loron 18 maiu.

Reportagem : Joanito Rangel

 381 Tatal Lee,  1 Views Today