Díli-yokalaumedia.com 17/04/2023 – Timor-Leste nu’udar nasaun ne’ebe restaura nia independénsia hafoin kore-an husi invazaun indonézia iha tinan 2002 no oras ne’e kompleta ona tinan 21.

Dezenvolvimentu iha área oin-oin hahu la’o maske ladauk responde timor-oan hotu nia espetativa, ita hare’e iha área defeza no seguransa hahu la’o dezde estabelese instituisaun defeza ida ne’ebe transforma an husi forsa gerilla ne’ebe sai liman kro’at povu maubere durante luta ba libertasaun nasionál, mak FALINTIL (Força Armada da Libertação Nacional de Timor-Leste) ba FALINTIL-Forsa Defeza de Timor-Leste ka F-FDTL.

Depoiz de estabelesimentu F-FDTL nian, governu ida ba governu seluk kontinua no komprometidu buka dalan atu dezenvolve instituisaun refere tuir mehi ida katak F-FDTL tenki sai forsa profisionál hanesan mos ezérsitu sira iha rai seluk. Avansu lubuk ida ne’ebe ita bele nota mak aumentu rekursu umanu, formasaun sira no infra-estrutura hahu di’ak, kondisaun membru sira hahu responde no mos legalidade sira hodi regulariza servisu militár nian, inklui mos lei sira ne’ebe garante servisu insituisaun.

Hafoin ne’e, mosu mehi ida tan mak oinsa atu estabelese ka hari’i Tribunal militár ida ne’ebe bele sai fatin ba tesi-lia bainhira militár ida komete ka pratika aktu ilísitu (kontra lei) ruma.

“Bele ka la’e hari’i tribunal militár iha Timor-Leste?”

Hatan ba pergunta kolokadu iha leten, Jurista Timor oan Pe. Júlio Crispim hateten iha nesesidade duni atu konstitui Tribunál Militár ida, tanba define ona iha Konstituisaun da Repúbliku Demokrátiku Timor-Leste (KRDTL) iha artigu 123 ne’ebe trata konaba kategoria Tribunál sira nian no artigu 130 ne’ebe ko’alia konaba Tribunál Militar sira.

Jurista refere aprezenta nia afirmasaun ne’e bainhira hala’o entrevista ida ho ekipa www.yokalaumedia.com iha nia rezidénsia Praia dos Coqueiros-Díli, kinta-feira, 13/04/2023.

“konstitusionalmete obriga atu hari’i Tribunál Militár, tamba iha kategoria tribunais ne’ebé prevé ona  iha artigu 123º KRDTL no haforsa ho lei Organizasaun Judisial ne’ebé konsagra iha artigu 18º, ne’ebé kolia konabá kriasaun Tribunal Militar, maibé tenke iha lei rasik (propria) ne’ebe mak sei prepara no inisia husi governu, espesialmente ministériu Defeza, além de ne mos presija rekursu umanu hodi funsionaliza instituisaun refere”, afirma Júlio Crispim.

Argumenta liu tan katak, Estadu hotu-hotu iha Tribunal Militar atu julga faktu ilísitu sira ka aktu ne’ebé kontra lei penal no mos atu julga ba aktu administrativu militar sira nian.

Dosente UNTL iha Fakuldade Direitu ne’e mos rekoñese importánsia husi estabelesimentu Tribunal Militár nian tamba militar hanesan Estadu ki’ik ida iha Estadu nia laran.

Rekorada fali katak oitavu governu konstitusional, lideradu husi ex-Komandante   F-FDTL, Taur Matan Ruak no Ministru defeza, Brigaderu General Reformadu Filomeno Paixão de Jesus, mos iha mehi bo’ot atu dezenvolve mos instituisaun refere, liu-liu estabelese Tribunal Militár, maibe mandatu hahu atu konklui ona, tan ne’e Ministru Defeza husik hela tatoli hela ba governu ida ne’ebe atu mai bele kontinua mehi ne’e tanba sansaun disiplinar la sufisiente atu regula aktu militar sira nian.

Reportajen : Elmerito Costa, Joanito Rangel, Nário Costa

 8,884 Tatal Lee,  1 Views Today