Díli, yokalaumedia.com (11/12/2024) – Konsellu Imprensa (KI) organiza konferensia ida ne’ebe partisipa husi na’in ba Média sira hodi hili reprezentante Orgaun Komunikasaun Sosiál ba Konselho de Imprensa ba tinan 2024 – 2029, iha salaun Golden Star.

Na’in ba Média ne’ebe rejista iha KI hamutuk na’in tolu nulu (30), nain rua nulu 20 mak partisipa iha konferensia refere entretantu na’in 19 de’it mak fo nia votu hodi nomeia sira nia representante liu husi kandidatu tolu mak hanesan José Sarito Amaral husi INDEPENDENTE, Suzana Cardoso husi MEDIA ONE TIMOR no Otelio Ote atual Presidente KI ne’ebe sei termina mandatu ihs fulan Fevereiru 2025.

Iha Prosesu demokratiku ne’e Suzana Cardoso mak eleita ba reprezenta Órgaun Komunikasaun Sosial ho votu sanulu (10), José Sarito Amaral hetan ho voto neen (6) no Otelio Ote hetan ho voto tolu (3).

Suzana, iha diskursu, esplika katak média Nudar pilar fundamenta ida ne’ebe hodi asegura ba kontrolu Sosiál no proteze eh garante konteúdu informativu no edukativu barak liu sai ba promove identidade Nasional no patrimóniu kultural Timor nian ne’ebe hatur ona iha Konstituisaun Repúblika Demokratica de Timor-Leste (KDRTL).

Representante ne’e mos promete fo kontinuidade ba programa sira ne’ebe mak iha ona, sei vizita média sira no funsiona fila fali Artigos numeru 5 ho 6 lei komunikasaun sosial nian ne’ebe hateten katak Estadu no Governu iha responsabilidade atu fo apoiu ba média sira nia ezistensia.

“Durante iha ha’u nia mandatu ha’u nia programa prioridade sira mak sei kontinuedade programa sira ne’ebe mak hatur ona iha konsellu Imprensa, sei vizita kada média ida-idak hodi hare diretamente saida mak sira presisa nu’udar prevensaun ida nune’e sira labele taka sira nia média no hodi funsiona lei komunikasaun artigu numeru 5 ho 6 ne’ebe hateten katak Estadu no Governu iha responsabilidade atu fo apoiu ba média sira nia ezistensia iha Timor-Leste”, Haktuir eleita Suzana Cardoso Hafoin Eleisaun, iha salaun Golden Star, 11/12.

Iha Fatin hanesan Nain ba média Lafaek News, Agapito de Deus, husu atu representante ne’e prioritiza tau atensaun media hotu ne’ebe existe iha Timor inklui media Plataforma Online.

“Ha’u nia rekomenda ba eleita Suzana Cardoso katak tenki tau prioridade no hodi ko’alia  Asuntu média nian  liu-liu média ho Plataforma online iha Timor-Leste ne’ebe mak fo votu maioria hodi Manan iha Eleisaun tinan ida ne’e”, Rekomenda Agapito.

Orgaun Komunikasaun Sosiál ne’ebe mak ohin ba partisipa hodi hili reprezenta konselu Imprensa mak Timor Post, Diligente, Independente, Media One Timor, VIP.TV, Yokalaumédia, Radio Voz, TvE-Timor, Loluwari, Lafaek News, Gardamor- News, Media Mudansa, Smnews, Bussiness Timor, SAPT News, Hatutan. Com, Dili Post, Lian Orluli no Dili Weekly.

Reporter : Eva Ximenes

 172 Tatal Lee,  3 Views Today