Díli, yokalaumedia.com (05/06/2023)- Radio Televizaun Timor-Leste, Empreza Publiku (RTTL.EP), hanesan instituisaun estatal ida ne’ebe hamri’ik hodi fornese informasaun ba públiku ne’ebe moris dezde 2002, iha ne’ebe inisia husi ex funsionáriu TVRI sira, iha tinan 2023 ne’e, kompleta ona tinan 21 nia ezisténsia hodi fahe informasaun ida ne’ebe los no kredível liu husi Rádio, Televizaun no ho plataforma Streaming.

Prezidente Republika (PR), Jose Ramos Horta, iha diskursu, parabeniza RTTL.EP tanba durante tinan rua ne’ebe lidera husi Prezidente Konsellu Administrasaun, Jose Belo “TARALEU” nia mandatu servisu diak no transforma RTTL.EP sai modernu liu tan maske ho montante orsamentu ne’ebe kiik.

“Ita kontinua servisu, hadia nasaun no hadiak RTTL.EP durante ita nia mandatu to’o tinan 2024 no Hau nia mehi ba RTTL.EP mak sai televizaun ida hanesan Metro TV Indonezia ho CNA Singapura”, elojia Jose Ramos Horta, iha segunda-feira (05/06/23), iha salaun OKA.

Horta husu atu RTTL.EP bele sai hanesan BBC hodi hari’i, hanesan exemplu, kanal Tétun, Portugéz, Bahasa Indonezia ho Inglezh.

“Rikezas Timor-Leste nian mak ba lingua ha’at ne’e no lingua ha’at ne’e mak reprezenta duni istoria no identidade Timor-Leste nian ba mundu”, esplika Horta.

Momentu hanesan Ministru Asuntu Parlamentar no Komunikasaun Sosial (MAPKOMS), Francisco Jeronimo apresia ho mudansa ne’ebe akontese iha RTTL,EP.

“iha ha’u nia mandatu halo servisu hotu atu dijitaliza RTTL, ita konsege duni no governu ida ne’e mos hakarak rai hela infra-estrutura ida ne’ebe mak bele fasilita servisu funsionáriu sira ho di’ak.

Iha biban ne’e mos membru governu ne’ebe tutela ba komunikasaun sosiál ne’e mos husu atu kontinua servisu ne’ebe mak nia la konsege durante nia mandatu.

“karik iha ha’u nia lideransa hamutuk ho imi halo buat ruma laloos, ha’u husu perdaun no durante ne’e ami halo buat ruma di’ak, husu atu kontinua, halo buat ruma ladi’ak hadi’ak liu tan ba no buat ruma ne’ebe mak seidauk halo, bele halo di’ak no furak liu tan”, hakotu membru Oitavu governu ne’e.

Reportagem : Eva Ximenes & Joanito Rangel

 1,753 Tatal Lee,  1 Views Today