Díli, yokalaumedia.com (11/08/2023) – Autoridade Nasionál Komunikasaun (ANC-Sigla Portugez), realiza seminariu kona ba Informasaun Komunikasaun Teknolojia (ICT-Sigla Inglesh) enkoraja labarik feto sira hodi estuda enjeñaria, siensia teknolojia no matematika.

“ami konvida estudante eskola hamutuk 17 mai partisipa iha seminariu ne’e atu loke sira nia hanoin no planu ba sira nia futuru iha area Espesialidade sira no ita mos promove nafatin Informasaun Komunikasaun Teknolojia ida ne’e”, hateten Prezidente ANC, João Olívio Freitas. Iha Timor Plaza, Sexta-Feira, (11/08).

Prezidente ANC, João Olívio Freitas haktuir katak realidade ne’ebe mak agora númeru labarik mane mak as liu mak eskola STM sira ne’e.

“Ita presisa Dudu no mellora labarik feto sira atu asesu diak liu tan iha area estudu Enjenaria, Siensia Teknolojia no Matematika ne’e”, tenik João Olívio Freitas.

Sekretariu Estadu ba Igualdade (SEI), Elvina Sousa Carvalho hateten SEI nia prejensa atu fahe informasaun no enkoraja labarik feto sira atu estudu iha area enjeñaria, Siénsia Teknolojia no Matemátika.

“ita bele enkoraja nafatin labarik feto sira atu bele estudu iha area Enjenaria, Siensia Teknolojia no Matematika tamba importansia tebes no partisipasaun  feto iha area refere menus liu”, sublina Elvina.

Membru governu ne’e mos husu ba estudante feto no mane atu utiliza teknolojia ho di’ak nune’e bele fo benefisiu ba moris

“ita hotu hatene katak iha Liberdade Espresaun maibe laos atu uza informasaun Komunikasaun Teknolojia hodi insulta malu no trata Lider Nasionál sira lae, maibe uza ho objetivu ne’ebe mak los no agora daudaun Labarik feto barak mak sai vitima iha Teknolojia ida ne’e tamba menus koenesementu oinsa atu uza informasaun komunikasaun teknolojia ida ne’e ho diak”, hakotu SEI.

Viana Zaza Bareto, estudante husi eskola sekundária Sta. Madalena de Canosa, sente kontente ho oportunidade hodi mai partisipa iha seminariu ida ne’e.

“Hau sente orgulu no kontente tebes tamba bele hetan esperensia foun husi eventu ne’e”, hakotu Zaza.

Tuir Zaza katak liu husi semináriu sira hanesan ne’e bele hasa’e liu tan koñesimentu no konsiénsia estudante sira nian atu utiliza teknolojia, espesialmente, internet ho di’ak.

Reportagem : Eva Ximenes

 1,111 Tatal Lee,  1 Views Today