Díli, yokalaumedia.com (26/08/23) – Primeiru-Ministru, Kay Rala Xanana Gusmão agradese ba Embaixada Indonézia iha TL ne’ebé organiza selebrasaun aniversáriu Indonézia day ho Tema “Indonesia Cultural Performans & Night Market” hodi hametin liután lasu amizade no kultura rai rua nian.

“Eventu ne’e hametin liutan kooperasaun, paz no kultura rai rua ho povu, ha’u agradese tebes bele partisipa iha eventu ida ne’e, obrigado ba oin ita sei servisu hamutuk hodi halo nafatin eventu sira hanesan ne’e”, informa PM Xanana liu hosi deskursu iha resintu Timor Plaza Komoro Dili.

Eventu ne’e hetan partisipasaun masimu hosi povu Timor-Leste tan bele sosa sasán nesidade baziku, roupa inklui sosa variedade aihan ne’ebé grupu no individu sira te’in no fa’an iha Night Market (Bazar Baratu).

Embaixador Indonézia ba Timor Leste, Okto Dorinus Manik agradese ba partisipasaun Prezidente Repúblika, José Ramos-Horta, PM Xanana, membru governu no povu Timor-Leste hodi harame eventu ne’e.

Eventu “Indonesia Cultural Performans & Night Market” inklui eventu “Pertamina Internsional Road Race” ne’ebé halo selebra loron FALINTIL ba dala 48 iha Tasi Tolu Dili foin lalais ne’e hodi komemorasaun loron Proklamasaun Independensia Indonézia ba dala 78, iha Dili Timor Leste.

Kebudayaan Republik Indonesia (KBRI) Dili organiza mós festival promove kultura tais trasionál hosi Indonézia nian tomak inklui konvida mós Artista hosi Kupang, Ambon Indonézia, Toton Caribo no  Justy Aldrin hamutuk ho artista Timoroan sira harame konsertu muzika ne’e hodi anima povu sira.

Entretantu, durante eventu ne’e, PR Horta no PM Xanana ho Embaixadór Okto Dorinus fahe mós premiu ba manan nain sira no vizita ba fatin Night Market hodi sosa sasán nesidade baziku, aihan fahe ba populasaun inklui labarik sira.

Reportagem : Eva Ximenes

 1,213 Tatal Lee,  1 Views Today