Díli, yokalaumedia.com (26/08/2023) – Prezidente Repúblika, José Ramos-Horta no Primeiru-Ministru, Kay Rala Xanana Gusmão apresia ba Artista Indonézia, Toton Caribo no  Justy Aldrin kolabora ho artisita Timor oan sira hodi anima povu Timor-Leste ho dame iha aniversáriu Indonézia day ho Tema “Indonesia Cultural Performans & Night Market”.

PR Horta konsidera eventu ne’ebé Embaixada Indonézia oraganiza ne’e hanesan mos iha mundu tomak inklui Timor-Leste la’o ho ambiente ne’ebe paz bele hametin unidade ba foin sa’e sira atu hakotu violensia atu promove dame, tolerensia no kultura ba mundu.

“Ha’u hanoin konserte muzika no kultura kalan ida ne’e rame tebes, ne’e hanesan eventu ne’ebé Indonézia halo iha propinsia hotu, parese iha Timor-Leste mak rame liu, tanba ohin kalan imi foin sa’e rihun mai hamutuk iha ne’e ho Avo Nana rame loos, tanba ne’e ha’u agradese ba Embaixador Okto Dorinus Manik ho nia ekipa tomak lori artisia hosi sorin mai anima ita iha kalan ne’e”, informa PR Horta liu hosi deskursu, iha timor Plaza, Sábado, (26/08).

Entretantu, PM Xanana ho nia estilu humoris dehan amizade ida ne’e hatudu ba mundu katak, Timor-Leste no Indonézia hakat makas tebes hodi konsolidade unidade no fó oportunidade ba governu Timor-Leste no Indonézia servisu makas ajuda malu iha área hotu- hotu.

“Ha’u kontente tanba, Indonézia no Timor-Leste hatudu ba mundu katak, tempu iha kotuk ne’ebé hotu ona, agora ita hare ba oin hodi fó razaun duni ba prezidente no atan ha’u atu komesa servisu ho Timoroan sira ne’ebé sei iha rai sorin para bele fila fali mai hela ho ita ho dame. Ohin kalan ne’e hatudu ho sira nain rua ne’ebé mai kanta ne’e halo ita hotu mai partisipa ho fuan no laran, ha’u admira no kontente tebes, tanba imi iha ne’e ho familia mós kontente, ha’u hakuak imi hotu ho domin”, PM agradese.

Fatin hanesan, Embaixador Indonézia ba Timor Leste, Okto Dorinus Manik, orgullu ho realizasaun eventu tinan ne’e tanba rame tebes no povu Timor-Leste ho vontade no entuaziasmu hodi partisipa.

Entretantu, Artista Indonézia, Toton Caribo no Justy Aldrin sente orgullu bele mai anima povu ho artisa Timor oan sira.

“Ami orgullu bele mai Timor, hasoru PM Xanana no PR Horta ho povu sira haree direita ambiente iha ne’e amizade tebes”, dehan Tonton Caribo

Artista Toton Caribo no Justy Aldrin hatutan, muzika favoritu tema, Bale Pulang, Pergi Dan Jangan Kembali no muzika seluk ne’ebé sira hananu Timor oan barak hatene, tanba iha muzika ida tema “Se Dimana” sira konta uza mós lian tetun atu promove mós lian tetun iha Nusa Tenggara Timor (NTT).

Durante konserte muzika, lider nasionál ne’e tun direita anima foin sa’e no labarik sira hodi dansa no tebe hamutuk no konsertu ne’e hetan seguransa masimu hosi Komandu PNTL.

Reportagem : Eva Ximenes

 416 Tatal Lee,  1 Views Today