Díli, yokalaumedia.com (30/08/2023) – Ekipa Juventude nia Lian organiza seminariu Nasionál ida hodi komemora loron konsulta popular ba dala 24, iha Xanana Gusmão reading room.

Konsulta Popular nu’udár prova ida husi povu nia desizaun hodi hakotu rezime Soeharto nian durante tinan 24 ne’ebé nakonu ho fitar, kanek, mata-been no lakon vida tan hakarak livre no independente.

Diplomata, Roque Rodrigues iha nia aprezentasaun  katak, sem loron 20 de agusto, loron Falintil nian sei la akontese mos konsuta popular.

“iha loron 20 fulan agustu tinan 1975 sai loron ida inportante no konsentra gerileiru sira, define nia pozisaun sai liman kroat ba povu Maubere, husi momentu ne’e duni, maka ema hotu ho domin hamri’ik defende nia rai no emar to’o mai konsulta popular, katak la iha ezistensia loron Falintil imposível atu akontese mos pro-integrasaun ho autonomia”, afirma Roque Rodrigues

Diplomata ne’e akresenta liu tan katak, tuir kristaun Santissima Trindade, Aman, Oan no Espiritu Santu ne’e ket-ketak maibe  ida de’it, nune’e Timor-Leste iha rasik mos nia Santissima Trindade maka, Frente Armada, Frente Klandestina no Frente eksterna (diplomasia), mesmu frente tolu ne’e misaun diferente maibe ho prinsipiu ida de’it maka buka ukun rasik-an.

Iha fatin hanesan, eis governante, Fidelis Magalhães, afirma katak geo ekonomika estrategika no geo politika ne’e ita presiza esforsu ida masimu nune’e kontribui ba merkadu livre, maibe ita presiza kriteria lubuk ida hodi priense.

“geo ekonomiku estrategiku no geo politiku ba oin ita sei esforsu maka’as, tanba iha nivel global ita observa liu-liu iha nasaun China tanba nia iha potensia ekonomia, nune’e ba oin ita sei presiza presupostu lubuk ida hodi priense maka oinsa, rekursu nia posibilidade, kulidade produtu lokal, sanitaria, laboratorium no seluk tan ne’ebé karik ba oin ita sei prepara-an masimu”, hateten Fidelis.

Eis Prezidente Konselu Ministru ne’e mos sugere atu sistema ekonomia ne’e tenki tau prioridade maka’as ba setor agrikultura liu-husi alokamentu orsamentu geral do Estadu ida bo’ot para bele hasa’e kapasidade esportasaun ke antes kompete ho país regional sira depois de tama ASEAN.

Partisipa iha seminariu nasional ne’e mak universitariu sira, juventude, ativista no organizasaun naun governamentais balun.

Reportagén; Cedelizio do Rêgo.

 3,283 Tatal Lee,  2 Views Today