Díli, yokalaumedia.com (03/09/2023) Loron 11 Setembru nu’udar loron importante ba luta timor-oan sira nian hasoru invazaun iha Timor-Leste, iha ne’ebe transforma ASDT ba FRETILIN, nu’udar frente ampla hodi kuda metin prinsipiu ukun rasik an, ne’ebe FRETILIN komunga hanesan doutrina politika ida atu kondúz povu maubere hamri’ik ho lian makaas buka liberdade ba nia rain no ba nia emar.

Komisaun Organizadora husi Juventude Fretilin (JF), realiza aktividade sertame ba estudante ensinu sekundáriu sira hodi komemora loron transformasaun ASDT ba FRETILIN ba dala 49 iha Cede Comite Central da Fretilin (CCF) Comoro, Díli Timor-Leste.

Iha biban ne’e mos sei realiza seminariu nasional iha loron 11 fulan setembru tinan ne’e no diskursu públiku ba universitáriu sira ho tema “Timor-Leste nia adezaun ba ASEAN” ne’eb’e tama ona ba faze eliminasaun, hela konkorente nain ha’at mak hakat ba final iha loron 13 setembru ne’e.

Transformasaun ASDT ba FRETILIN ne’e parte ida husi istória ba Timor-oan hotu hodi koko hateke ba kotuk hodi buka hatene obstakulu sira iha pasadu nune’e bele hakat ba oin, liu-liu ba foinsa’e sira ne’ebé iha hela dalan aprendizagén nian, ho nune’e maka Juventude Fretilin iha hanoin ida hodi kapasita estudante sira kuñesimentu, liu husi atividade sira ne’e.

Sekretáriu Juventude Fretilin, Abão Nokosiku Saldanha, iha diskursu hateten momentu ne’e importante atu fo espasu ba maluk foinsa’e sira hodi manifesta nia ideia konaba istória.

”ohin Juventude Fretilin (JF) aktividade diskursu ne’e realiza hodi selebra 11 de setembru ne’ebé ASDT transforma-an ba FRETILIN, entaun loron ida ohin inportante tebes, atu fó espasu ba universitariu sira hodi espresa hanoin sira, liu husi diskursu sira hanesan ne’e”, afirma Nokosiku

Iha sorin seluk, Prezidente ekipa Jurí diskursu publiku, Efrem Trinquedos, hateten bele lakon buat hotu-hotu maibe labele lakon oportunidade no esperansa.

”Bele lakon buat hotu-hotu maibé labele lakon oportunidade no esperansa tanbá iha ambiente ne’ebé de’it nia rasik nu’udár fatin aprende”, afirma Efrem Trinquedos.

Universidade hirak ne’ebé partisipa iha kompetisaun ne’e mak hanesan; UNITAL, UNTL, UNPAZ, IOB, UCT, ISFIT, ICS, ISC no DIT.

Universidade hirak ne’e, iha faze eliminatóriu instituisaun 4 mak kosege hakát ba final hanesan; Anita Fernandes husi UNITAL, David Barreto Barros husi UNTL, Jenilda da Costa Canossa husi DIT no Deonisio de Pinto husi UCT.

Finalista ida ne’ebe sei okupa iha primeiru lugar mak sei aprezenta direta iha serimonia loron transformasaun ASDT ba FRETILIN, segunda-feira 11 de setembru, ne’ebe sei hala’o iha Cede Comite Central da FRETILIN (CCF), iha Comoro Díli.

Reportagén; Cedelizio do Rêgo

 2,394 Tatal Lee,  1 Views Today