Díli, yokalaumedia.com (05/09/2023) – Ministra Edukasaun Dulce de Jesus Soares simu vizta ida husi Gabinete Koordenadora ba rejidensia das Nações Unidas (UN Resident Coordinator’s Office) hodi kolia kona-ba  apoiu ne’ebe ONU fo durante ne’e ba Timor-Leste, Iha Vila Verde.

Ministra Edukasaun, Dulce de Jesus Soares, esplika katak  ONU liu husi UN Resident Coordinator’s Office, Funmi Balogun, aserta nafatin nia apoiu ba Timor-Leste, espesialmente iha área Edukasaun.

 “ohin ami enkontru ho koordenadora ba rejidensia ONU nian iha Timor-Leste, kolia kona ba sira nia apoiu durante ne’e ba ministeriu edukasaun liu husi ajensia ONU nian ne’ebé servisu iha Timor-Leste no ba oin sira sei kontinua fo apoiu mai iha governu Timor-Leste no mos ba edukasaun”, esplika Dulce.

Membru governu ne’e mos konta katak ONU durante apoia ona ensinu Pre-Eskolar no ensinu báziku  sira liu husi ajénsia UNICEF inklui apoia iha programa merenda eskolar no dezenvolvimentu kurikular liu husi WFP, konta Dulce de Jesus.

Funmi Balogun, Gabinete Koordenadora ba rejidensia das Nações Unidas (UN Resident Coordinator’s Office), afirma katak iha sorumutu ne’e aborda mos futuru kooperasaun entre ONU no Ministériu Edukasaun.

“ohin mai atu fo parabéns ba Ministra no mos Kolia kona ba apoiu ONU ba ministeriu edukasaun nian ba oin no mos kolia kona ba programa sira ne’ebé hala’o ona iha edukasaun husi ensinu báziku to’o ensinu sekundariu no rona mos Ministra nia hanoin saida mak setor edukasaun  presija”, informa Funmi Balogun.

Nia mos sublina katak programa apoiu merenda eskolar ne’e La’os de’it iha Díli maibe ba teritoriu Timor tomak, no dezafiu barak mak ita hasoru La’os iha ami nia kontrolu maibe problema ne’e mak menus ai-han sira ne’ebé produs iha rai laran, ba oin ami sei kontinua apoiu nafatin ba governu ida ne’e.

REPORTAGEM: Joanito Rangel &  Cedelizio Rêgo.

 2,184 Tatal Lee,  1 Views Today