Dili, yokalaumedia.com (08/09/2023) – Ministériu Edukasaun liu husi  Sekretária Estadu Ensinu Sekundáriu  Jerál no Ensinu Sekundáriu Tékniku Vokasionál estabelese kooperasaun ho Governu China South Publishing & Media Group, hodi apoia material eskolar hanesan Livru 1000.

Sekretáriu Estadu Ensinu Sekundáriu Jerál no Tékniku Vokasionál, Domingos Lopes Lemos, esplika katak governu China hakarak apoia livru ba ensinu sekundariu Tékniku Vokasionál.

“sira apoiu ita iha parte doasaun livru ho mos ekipa ICT nian, dizitalizasaun ba eskola sira liu liu ba ensinu sekundáriu Tékniku Vokasionál iha ita nia rain, governu China apoiu livru ho tatal 1000, livru sira ne’e foka liu siensia teknolojia ba área Tékniku Vokasionál nian no livru sira ne’e sei rai iha bibleoteeka atu bele halo gestaun di’ak nune’e estudante hotu bele asesu“, esplika Domingos Lopes.

Governante ne’e afirma liu tan katak programa IX governu konstitusionál iha tempu badak sei revé ba kuríkulu ensinu sekundariu Jerál no Ensinu sekundario Tékniku Vokasionál.

“atu bele responde ba merkadu traballo presiza tenki halo kurikulum ne’ebe koresponde ho mudansa ne’ebe iha, se ita tama iha Asean entaun kurikulum ne’e mos tenki relevansia ho Edukasaun Asean nian. No iha tempu badak ami  sei halo mos mudansa ba profesor sira Laos espesialidade iha area ensinu Tékniku Vokasionál, no ami sei kria  bolsa kandidatura para bele responde ba profesora sira hodi prese iha  Ensinu Tékniku Vokasionál“, afirma Domingos.

Serimónia asinatura ne’e partisipa husi membru governu no embaixador China inklui mos funsionáriu husi Ministériu Edukasaun, Vila Verde Díli, sexta-feira ne’e.

Reportagem: Joanito Rangel

 3,676 Tatal Lee,  1 Views Today