Ensinu Istória konstrui hanoin koletivu sidadaun nian iha futuru

Díli, yokalaumedia.com (26/09/2023) – Sentru Nasional Chega (CNC-Sigla Portugez), organiza workshop ho tema kualidade historia no edukasaun ba Paz iha Timor-Leste,  ne’ebe realiza ona, hamutuk ho professor Istória munisípiu seluk no ohin hamutuk tan ho profesor Istória ne’ebe hanorin iha eskola Primária no Sekundária husi munisípiu hat hanesan Aileu, Liquica, Manufahi inklui Rajiaun Administrativu Espesial Oecusse Ambeno, (RAEOA) hamutuk ema na’in 40, hodi hasa’e sira nia koñesementu nune’e bele kontribui no reforsa responsabilidade no kapasidade nasional harii futuru di’ak ida ne’ebe nakonu ho dame, justisa no prospiedade iha Timor-Leste.

“sorumutu ne’e atu valoriza koñesementu no responsabilidade professor sira nian kona ba istória nasionál hodi hasa’e abilidade pedagójika no mos atualiza rekursu ensino (Livru, Relatóriu, audio no matérial vizuál) sira no fahe esperiénsia kona-ba Istória ne’ebe hanorin iha eskola atu aprende entre sira seluk iha rede professor Istória nian”, hateten Diretor Ezekutivu CNC, Hugo Maria Fernandes, iha CNC, tersa-feira, (26/09).

Hugo Fernandes mos esplika katak Istória sai hanesan forsa positivu ida ba rekonsiliasaun no konstrusaun dame nian tanba ne’e importante atu insere ba materiál ensinu inklui kuríkulu eskolár no tenki iha narativa ekilibrada no inkluziva, maibe mos edukasaun síviku no dame nian konsentra iha dever no responsabilidade sira juventude nian nu’udar membru nativu sosiedade integra iha pedagojia.

Diretor CNC mos afirma liu tan katak profesor sira tenki hatene istória ho di’ak atu nune’e bele sai hanesan forsa katalitika ba rekonsiliasaun no konstrusaun pás iha prosesu ensinu aprendizajem.

“Istória iha papél importante ida iha uniaun sosiál no konfiansa iha komunidade lokál no nasionál, kontribui hodi maneira posetivamente ba rezolusaun konflitu no konstrusaun dame nian tanba Ensino Istória laos de’it permiti jerasaun foun atu rekoñese difikuldade sira kona-ba pasadu, maibe mos ajuda hanoin koletivu futuru ne’ebe sira hakarak moris hanesan komunidade ida no sosiedade ida tomak”, afirma Hugo.

Hugo haktuir katak eventu ida ne’e akontese tamba servisu hamutuk entre sentru Nasional Chega!,Minisrériu Edukasaun (ME), United Nations Educational, Scientific and Cultural Organization (UNESCO) no apoiu husi Korea International Cooperation Agency (KOICA).

Reportagem : Eva Ximenes

 5,039 Tatal Lee,  1 Views Today