Kondisaun eskola bázika filial Cailaque-Ahic la fo biban ba estudante halo atividade

Viqueque-Ahic, yokalaumedia.com (28/09/2023) – Eskola Basika Filial Cailaque ne’ebe lokaliza iha Munisipiu Viqueque, Postu Administrativu Lacluta, Suku Ahik, Aldeia Kaiua enfrenta problema menus sala de aula no fasilidade ensinu.

“Ami nia eskola ne’e menus sala de aula ho fasilidade hanesan Armari hodi tau livru, Mesa, Kadeira Ba Professor sira la iha, Fatin atu Dokumentus importante sira la iha no Biblioteka mos la iha inklui mos menus Profesor”, hateten profesor Filomeno Soares bainhira simu entrevista husi Jornalista yokalaumedia, iha eskola Cailaque, Tersa-feira (26/09).

Filomeno Soares, fundador eskola, informa katak hahu loke  eskola Basica filial Cailaque iha tinan 2004 to’o agora no total Sala aprendizajem tolu.

“Ha’u hahu loke eskola Basika Filial Kailaque iha tinan 2004 no uma ida fahe ba sala Tolu hodi utiliza ba aprendizajem kompostu husi primeiru ano to’o sexto ano, sala ida utiliza husi primeiru ano to’o terseiru ano, kuartu ano ho kuinto ano utiliza sala ida no sexto ano sala ida”, esplika profesor Filomeno.

Estudante ne’ebe hala’o estudu iha eskola refere hamutuk 115, kompostu husi Feto hamutuk 54 no Mane hamutuk 61 no preofesor hamutuk professor kontratadu ema na’in 1 no Permanente na’in 3.

Nia mos afirma katak eskola refere nia Kondisaun ladiak ona tamba ai sira ne’e hahu dodok ona,  maibe nafatin utiliza hodi realiza prosesu ensinu aprendizajem.

“ami nia kondisaun eskola la dun diak ona tamba ai sira ne’e sai lahuk hotu ona maibe lahamate ami nia vontade hodi hanorin nafatin, akumula estudante sira hotu atu mai tuir prosesu aprendizajem iha eskola hamutuk ho ami profesor na’in 4 no iha tempu udan bo’ot ho anin bo’ot ami hapara hotu estudante sira labele tuir sala de aula tamba kondisaun eskola refere ladun diak ona”, esplika Filomeno.

Estudante Juvinilia Soares, 6⁰ Ano, sente kontente hodi aprende no simu lisaun husi manorin nain sira maske agora kondisaun eskola mak ladun diak ona.

“ha’u sente kontente bainhira aprende hamutuk ho ha’u nia manorin nain sira sempre motiva no dedika ami hodi sai estudante ne’ebe mak diak ba rai ida ne’e no nasaun ida ne’e no prepara ami nia futuru diak ba nasaun Demokrátiku ida ne’e, maske ho kondisaun eskola ne’ebe mak ladun diak ona maibe lahamate ami nia vontade atu aprende”, haktuir estudante.

Estudante ne’e husu ba parte relevante atu tau matan ba eskola refere no bele rezolve problema ne’ebe mak suku refere infrenta no Suku Ahic iha liu Area Rural ne’ebe susra Asesu ba informasaun liu husi Média, tanba suku ne’e seidauk eletrifika husi governu maske ukun-an tinan 20 resin ona.

Tuir observasaun katak poste elétriku hahu harii ona iha suku Ahik, maibe komunidade sei susar atu asesu ba kondisaun estrada ne’ebe di’ak.

Reportagem : Mário da Cruz

 3,643 Tatal Lee,  1 Views Today