Díli, yokalaumedia.com (4/10/2023) – Sentru Nasionál Chega (sígla Portugéz CNC I.P) ho Ministériu Edukasaun konkorda hamutuk atu servisu ba implementa rekomendasaun husi relatóriu sira husi CHEGA no mós Relatóriu per memoriam ad spem iha área edukasaun no memorializasaun, ne’e realiza iha salaun CNC Balide-Díli.

Ministra Edukasaun, Dulce de Jesus,  esplika katak asintura ne’e hanesan extensaun ba akordu ne’ebe estabelese ona iha tinan 2018 nian.

“ministériu edukasaun servisu tiha sentru nasionál Chega hodi, iha momentu ida halo revizaun ba kuríkulu 10 no 20 síklu liu-liu inklui ona istória sira ne’ebé produs ona husi sentru Chega iha kuríkulu ba 40 no 50 ano”  esplika Dulce de Jesus, iha salaun sentru nasionál chega!, iha tersa-feira (3/10) ne’e.

Nota entendimentu ida ne’e atu integra konteúdu relatóriu Chega no relatóriu husi Comissão da verdade e Amizade (CVA)- per memoriam ad Spem.

Diretór ezekutivu CNC, IP, Hugo Maria Fernandes, akresenta katak “ tinan ida ne’e sentru nasionál Chega! kontinua fó apoiu ba ministériu edukasaun hodi integra tan konteúdu relatóriu Chega no relatóriu CVA nian ba ensinu terseiru síklu no ba eskola sekundáriu.

“klaru dalaruma ema hanoin entrega matéria ba kuríkulu ne’e livru hotu ne’e tenke tama, maibe ne’e esforsu ida ne’ebé dedikadu no komplikadu uituan no sientífiku, tanba ne’e CNC prontu atu kontribui kualker matéria. Agora fila ba ministériu edukasaun oinsa selesiona matéria sira ne’e hare ba nivel eskolaridade, bele tama iha terseiru síklu no ida ne’e mak tama iha eskola sekundária para depois sei iha kontinuasaun”, akresenta Hugo.

Hugo Fernandes mos garante katak esforsu ne’ebé mak sentru Chega halo hamutuk ho ministériu edukasun, bele konkretiza nune’e integra ona konteúdu husi relatóriu rua ne’e ba iha kuríkulu.

CNC fo sei apoia tan formasaun ba manorin-na’in sira, apoia estabelese Biblioteka sira inklui atividade seluk ne’ebe bele fasilita liu tan prosesu aprende istória.

“ami mos kontinua  apoiu makaas ministériu edukasaun ba formasaun ba profesór sira, apoiu ba estabelesimentu bíblioteka sira iha eskola lao nafatin  to’o agora no apoiu atu introdúz lalaok hanorin istória la’os iha aula laran de’it, maibe liu husi Chega Tour, lori estudante mai vizita iha sentru chega no inklui fó trabalho de casa iha ne’ebé oan sira dokumenta inan aman sira nia memória depois mai públika ne’e importante los iha aspetu memorializasaun”, afirma Ezekutivu ne’e

Ministra mos klarifika liu tan katak governu ida ne’e kontinua buka meiu hodi hafasil estudante sira no profesór sira atu aprende matéria istória.

“atu reforsa tan katak, durante governasaun ne’e la’o to’o dalan klaran mak mosu tan idea sira ne’ebé mak atu hafasil liu tan estudante sira no profesór sira atu aprende matéria istória. Por ezemplu iha ministériu edukasaun mak iha loron nasional sira ita fo tiha fali férias ba estudante sira, entaun laiha atividade ruma  ke antes, durante ka depois  para estudante sira komprende loron hirak ne’ebe ita komemora refere. Tanba ne’e ba futuru, ami  hanoin meiu ruma atu bele reforsa liu tan implementasaun istória, sira rona no sira mos prátika liu husi vizita no seluk tan”, subliña ministra.

Ministériu Edukasaun  no CNC hahu ona dezenvolve matéria sira istória nian ba estudante sira iha nivel esinu hotu tan hamosu ona grupu tékniku konjunta, ne’eb’e kompostu husi membru na’in 4, hodi tau matan ba implementasaun, halo monitorizasaun no avalizasaun anualmente no sei inklui mos instituisaun no entidade sira seluk bele mos tama iha elaborasaun matéria kuríkulu.

Relembra fali katak Ministru Edukasaun hamutuk no CNC realiza ona  atividade balun hanesan Semináriu, Kompetisau sertame, Estabelesimentu Biblioteka Chega!, dezde 2018-2020 iha munisipiu 5, eskola 10 no Universidade 2 ne’ebe kompleta mos livru unidade 3.660, inklui mos distribui ba esinu báziku, sekundáriu no inklui universidade, hamutuk 4.521 livru.

Reportagem : Apolinário da Costa

 1,123 Tatal Lee,  1 Views Today