Díli, yokalaumedia.com (07/10/2023) – Klibur Estudante Universitariu Luro (KEUL), realiza seminariu nasionál ne’ebe envolve Ministro Juventude, Desporto, Arte e Cultura (MJDAK) no Eis Deputadu Osorio Florindo ko’alia konaba “Perspetiva Eleisaun Lideransa Komunitáriu iha Teritóriu Nasionál” ne’ebé realiza iha Xanana Reading room Díli Timor-Leste.

Organizasaun KEUL hanesan asosiasaun Estudantil voluntáriu ne’ebé hari’I husi  Joven Universitáriu sira iha loron 28 fulan agustu tinan 2011, iha ne’ebé ho objetivu atu sai jente transformador, kontrolo sosial no sai lian ba lian laek sira iha sosiedade Timorense hodi hari’I sosiedade sivilizadu, modernu, demokrátiku, igualitariu, solidáriu, prosperu no fraternu ba timor-oan hotu.

Iha semináriu ne’e, Ministro Juventude, Desporto, Arte e Cultura, Nélyo Isaac Sarmento, aprezenta nia apoiu material liu-liu kuñesimentu oinsa iha kapasidade ida di’ak hodi jere suku ne’e ba oin.

“Dahuluk liu ha’u apresia tebes ho inisiativa ne’ebé Luro oan sira halo, mesmu ita hare’e simples de’it maibé iha valor tebes atu kontribui ba ita nia sosiedade ida ne’e espesial ba ita nia nasaun. Ita hare’e agora iha faze ida ba eleisaun suku tanba ne’e maka, ba oin period tinan hitu (7), ita mos hanoin hodi apoia kbi’it saida mak ita iha, la’os de’it ba material de’it maibé mos ba kuñesimentu no formasaun sira nune’e sira iha kapasidade para bele jere suku ne’e ba oin”, dehan Ministério Juventude.

Iha sorin seluk, Kordenadór Interinu, Calistro dos Santos “Sure”, afirma tan katak sei define oportunidade, dezafiu no progresu ba oin, tanba fator determinante ba dezenvolvimentu nasionaá mak ema, maibé ema ida ne’ebe atu deside nasaun, munisipiu postu to’o suku ka aldeia ida nia destinu mak líder.

“hare’e husi observasaun geral KEUL nian desde 2011 to’o agora, realidade ita hare’e no ita kuñese ba oin saida maka ita hasoru, tanba ne’e maka ita define oportunidade, dezafiu no progresu tuir mai, fator ida determinante maka ema, mas ema ne’e barak, maibé ema ida atu deside nasaun, munisipiu, postu, suku no aldeia ida nia destinu, primeiru maka lider, entaun lider ne’e mai husi ne’ebé, entaun lider ne’e mai husi eventu ida, fo espasu hanesan agora dadauk ita halo. Tanba ne’e maka KEUL deside halo seminariu ida liga ba eventu eleisaun ne’e, tanba dalan votasaun ne’e mos barametru ba dezenvolvimentu, tanba kuandu ita hili sala, konsikuensia nafatin mai ita, ho nune’e ita presiza duni informasaun sira para se los maka merese duni ita nia kandidatu hodi dezenvolvimentu suku ida nian ba oin”, hateten Sure.

Kordenadór Interinu ne’e mos rekomenda ba joven sira atu hamahan an iha organizasaun, tenki brani nafatin atu foti desizaun tanba Timor nia destinu iha foinsa’e sira nia liman. Jovem ne’e mos ba joven sira atu priense kualker oportunidade ne’ebe iha, hanesan eleisaun suku ne’e, atu barani foti desizaun kandidata an tanba dezenvolvimentu presiza  joven intelektual sira lidera suku.

Reportagem: Cedelizio do Rêgo.

 6,000 Tatal Lee,  1 Views Today