Díli, yokalaumedia.com (07/10/2023) – Sekretáriu estadu komunikasaun sosiál vizita Rádiu Komunidade Defisiénsia Timor-Leste (RKDTL), ne’ebe lokaliza iha Aldea São José, suku komoro postu administrativu Dom Aleixo, Munisípiu Dili, hodi haree direta kondisaun estúdiu rádiu komunidade Defisiénsia Timor-leste, iha estúdiu rádiu KDTL, sesta-feira, Dili.

Sekretáriu Estadu Komunikasaun Sosiál hateten vizita ne’e atu bele haree direta no besik kondisaun estúdiu rádiu nian.

“ha’u sente ksolok tanba bele haree kondisaun rádiu komunidade defisiénsia ne’ebe di’ak tebes, di’ak iha sentidu katak nia aprezentasaun iha nia estúdiu no ekipamentu sira ne’ebé iha no mos nia profesionál sira ne’ebé iha, husi talk show ne’ebé sira halo”, haktuir Governante ne’e iha Sexta-Feira (06/10).

Governante ne’e mos dehan katak IX governu sei fó atensaun ba rádiu komunidade sira tanba órgaun komunkisaun sosiál ne’e liña frente ne’ebe fornese informasaun ba komunidade.

“IX governu sente katak komunidade importante iha nia governasaun ne’e tanba atu bele hala’o polítika desentralizasaun administrativa iha tempu oin mai i rádiu komunidade nia papél importante hanesan mos média konvensionál sira seluk plataforma dijitál sira seluk iha prosesu konstrusaun estadu, governu mos sei kapasita profesionál sira  no sei orsamenta hodi apoiu ekipamentu balun iha 2024”, promete Expedito.

Prezidente Rádiu Komunidade defisiénsia Timor-Leste, Gaspar Afonso, konta katak ezisténsi rádiu ne’e hahu ho inisiativa husi portadór defisiénsia sira tanba sira iha kapasidade intelektual iha área jornalizmu no arte múzika.

“Rádiu ida ne’e harii iha tinan hirak liu ba, hodi responde ema ho defisiénsia hotu-hotu iha Timor nia hakarak atu iha rádiu ida no hakarak mos atu hatudu ninia abilidade iha vida jornalizmu. Rádiu ne’e estabelese atu sai lian ba ema ho defisénsia”, hateten Gaspar.

Prezidente rádiu ne’e mos rekomenda atu tau prioridade no sériu hodi dezenvolve rádiu ida ne’e tantu ninia infra-estrutura isra no mos nia rekursu umanu.

Reportagem : Apolinário da Costa

 6,278 Tatal Lee,  1 Views Today