Monumentu Integrasaun reprezenta istória inisiu Invazaun

Bobonaro-Balibo, yokalaumedia.com (15/11/2023) – Governu Timor-Leste liu husi Ministeriu Juventude Desportu Arte no Kultura (MJDAK), espesialmente Sekretariu Estadu Arte no Kultura(SEAK) Servisu hamutuk ho Centru Nacional Chega (CNC) organiza Festival Fronteira ho tema “INTERKAMBIU KULTURAL BA HAMETIN REKONSILIASAUN”, ne’ebe mak realiza iha munisipiu Bobonaro.

Iha biban ne’e mos lori timor-oan no Indonézia oan sira ba vizita mos monumentu Integrasaun, fatin deklarasaun Balibo, ne’ebe harii iha Postu Administrasaun Balibo, dezde 1985 liu ba kotuk.

Durante Vizita giada ne’e, Diretor Centru Nacional Chega, Hugo Fernandes, haktuir katak vizita ne’e atu jerasaun foun no vizitante husi rai rua bele hatene istória pasadu.

“organiza partisipante husi jerasaun foun husi Timor-Leste no Timor oan sira iha Indonezia hodi ba vizita monumentu Integrasi ne’ebe hari iha loron 30 fulan Outubru tinan 1985 atu nune’e iha konesementu kona ba memoria pasadu nian hodi hametin rekonsiliasaun”, esplika Hugo Fernandes, iha Balibo quarta-feira (15/11) ne’e.

Hugo Fernandes mos afirma liu tan katak Monumentu integrasaun ne’e halo hodi simboliza inisiu Invazaun ne’ebe halo husi Indonézia.

“modelu hanesan angulu hitu ne’ebe simboliza Invazaun, 7 dezembru, Indonézia tama mai Timor-Leste, no nia naruk metru 5. Monumentu integrasaun ida ne’e hanesan istoria ou memoria pasadu nian ne’ebe ita hotu tenki respeita no kuidadu hodi promove rekonsiliasaun entre Timor-Leste nia oan sira ho Timor oan ne’ebe iha Indonezia”, haktuir diretor Ezekutivu CNC.

Desizaun sira ne’e timor-oan sira foti hanesan opsaun polítika ida ne’ebe foti bainhira iha tinan 1999 liu ba.

Reportagem : Eva Ximenes

 2,790 Tatal Lee,  1 Views Today