Festival Fronteira hametin Relasaun Timor oan iha Indonézia no TL

Bobonaro-Maliana, yokalaumedia.com (15/11/2023) – Ministru Juventude Desportu Arte no Kultura (MJDAK), Nelio Isaac Sarmento hateten programa festival kultural ba tinan ida ne’e importante tebes tamba atu hametin ligasaun entre timor-Leste ho timor oan sira ne’ebe mak hela iha nasaun Indonezia.

Lia hirak ne’e hato’o husi Membru Governu refere bainhira lansa Festival Fronteira ne’ebe organiza husi SEAK no CNC iha Munisipiu Bobonaro.

“Ita hotu hatene programa festival kultural tinan 2023 importante tebes ba ita hotu hodi hametin relasaun entre ita ho ita nia maluk sira ne’ebe mak hela iha nasaun Indonezia liu-liu ita sira ne’ebe hela iha fronteira no ita koalia kona ba hametin relasaun ita sente no konsente katak ita ran ida de’it,illa ida de’it no iha lisan no kultura rasik”, hato’o MJDAK, Nelio Isaac Sarmento, iha nia diskursu, kuarta-feira, 15/11.

Iha momentu hanesan Diretor Ezekutivu Centru Nacional Chega (CNC), Hugo Maria Fernandes haktuir katak aktividade ne’e mos atu halibur timor oan hotu-hotu atu tau neon ho fuan no laran hotu atu hari timor ida buras liu no respeita ema hotu nia liberdade.

“Ohin kalan sente onradu tebes hamrik iha ita bo’ot sira nia oin atu hahu husi tinan ida ne’e kooperasaun diak tebes Nai sekretariu Estadu Arte no Kultura bele realiza atividade ida ne’e hein katak bele la’o ho diak iha semana ida ne’e nia laran no ha’u agradese tebes ba Nai sekretariu Estadu Arte no Kultura ba nia prontidaun, disponibilidade ho nia matenek ohin ita bele hamutuk iha fatin ne’e”, hateten Diretor CNC, Hugo Maria Fernandes, iha nia diskursu.

Hugo mos informa katak Timor-Leste uluk iha beiala sira nia tempu illa Timor iha ida de’it depois de kolonializasaun mak iha nia markasaun Geografika no Politika, hafoin iha tinan 1999 ne’e mos halo markasaun politika entre Republika Demokratika de Timor-Leste ho Republika Indonezia.

“iha markasaun politika ne’e labele sai sasukat ba ita nia habelun malu ita atu kesi fila fali tali husi ita nia beiala sira, lisan no kultura laiha fronteira tamba ida ne’e mak hahu kalan ida ne’e ba oin ita nia lisan no kultura tau hamutuk hodi haburas ita nia jerasaun sira”, afirma Hugo.

Festival fronteira tinan 2023 ho tema interkambiu kultural hodi hametin rekonsiliasaun marka mos prezensa husi timor-oan sira balun ne’ebe oras ne’e hela iha Malaka, Belu, Kefa no Kupang, inklui mos Timor-oan sira iha Bobonaro, Covalima no RAEOA.

Reportagem : Eva Ximenes

 3,538 Tatal Lee,  2 Views Today