Díli, yokalaumedia.com (25/11/2023) – Luta Libertasaun Timor-Leste nian, timor oan barak inklui mos ema husi rai balun tenki soe isin lemorai no ruin naklekar hodi sosa. Iha Loron 24 Fevereiru 1999 liu ba, inimigu tiru mate foin sa’e na’in 2 mak hanesan Francisco Hornay no Joaquim de Jesus.

Saudozu Francisco Hornay moris iha loron 02-09-1976 hosi Aman, Domingos da Costa Hornay, Inan Luisa Albeti Hornay no saudozu oan ba dala neen, hosi maun alin nain-12 no mane 7 feto 5.

Enkuantu Saudozu Joaquim de Jesus, moris 13-05-1978 hosi Aman Placido de Jesus (saudozu), no Inan Lorença Rosa no saudozu nu’udar oan ba dahuluk hosi maun alin na’in- 8, kompostu feto 5 no mane 3.

Tanba ne’e familia no komunidade Suku Camea, Aldeia Bedois, hari’i monumentu ida hodi homenajeia foin sira nia luta no sakrifisiu hodi sosa ukun rasik an.

Primeiru-Ministru, Kay Rala Xanana Gusmão  akompaña hosi Tenente Jenerál Reformadu, Lere Anan Timur hamutuk ho familia no populasaun sira inagura monumentu refere hahú ho misa agradesimentu.

Familia agradese ba PM Xanana no Komandante Lere Anan Timur nia prezensa hodi rekoñese luta ne’ebé saudozu nain rua hamutuk ho ema rihun ne’ebé mate hodi kontrui Timor-Leste sai nasaun independente ida.

“Ami familia rua ho juventude rezistensia hotu hato’o agradese ba PM Xanana no Maun Lere Anan Timur ohin mai hamutuk ho familia no juventu sira partisipa iha eventu ne’e hodi hanoin hikas memoria murak juventude nain rua hamutuk ho juventude rihun ne’ebé mate hodi liberta nasaun Timor-Leste,” Tito agradese.

Reprezentante Familia ba Saudozu nain rua, Tito da Conceição Hornay “Todaho” hamutuk ho Xefe Aldeia Bedois, José Pereira, agradese ba Kompaña Montana Di’ak ne’ebé apoia konstrui monumentu ne’e too remata.

Iha oportunidade ne’e, Manuel Sarmento, nu’udar Juventude Rezistensia Bedois promote sei halibur intelektuál sira atu hakerek istória moruk sira relasiona ho momentu refere.

“Monumentu ita inagura ona, ami sei kompleta hodi hakerek istória para kompleta akontesimentu ne’e ninia istória tanba sa no oinsa maka bele akontese,” Manuel promote.

Entretantu, Primeiru-Ministru Xanana dezafia familia no sasin sira atu hakerek istória moruk kona-ba saudozu sira nia mate atu labarik sira iha eskola bele aprende no hatene katak, sira moris no boot pertense ba aldeia, suku no munisipiu ne’ebé partisipa mós iha Timor-Leste nia luta.

“Ohin loron importante ida hodi halibur ita iha ne’e, hodi fó lembra fali susar ne’ebe ita hotu hakat liu. Depois hatene tiha istória hirak ne’e hotu, no simu kumprimisu ida atu hakerek ninia istória ne’e importante,” PM apela.

Xefe Governu hatutan, nia la’o perkore Timor-Leste haree ona fatin barak mosu masakre oin-oin hodi husu  ba vitima ka sasin sira iha kada fatin masakre  idak-idak atu hakerek istória.

“Iha Oecusse grupu ida komesa hakerek ona, iha Dili balun hakerek ona, maibé ha’u seidauk hare nia rezultadu. Imi tenki hakerek didi’ak ninia istória hodi iha eskola bazika sira ne’e, ita nia oan sira komesa aprende no hatene katak, sira moris hela iha fatin ida ne’ebé di’ak tebes partisipa iha funu no iha luta. Dala ruma, ita la fó sai istória sira ne’e, imi hakilar de’it Avó Nana- Avó Nana. Hanesan fali Avó Nana mesak mak halo istória, afinal ema barak mate no sei moris mós halo istória,” tenik PM

Entretantu iha oportunidade ne’e Xefe Governu Xanana husu ba juventude rezistensia atu halibur joventude hotu- hotu hases aan hosi grupu arte marsiál hodi hametin sira nia unidade kontribui ba dezenvolvimentu.

PM hatutan, iha tinan 2024,  sei  hala’o vizita ofisiál ba Jakarta-Indonézia atu ko’alia ho Prezidente Joko Widodo atu aperta lutu seguransa iha fronteira kontrola juventude balun ne’ebé hakat tama ilegál ba halo juramentu iha Indonézia.

  “Iha Bedois-Becora ne’e, imi  juventude rezistensia sira hamutuk ba para lori labarik hases aan tiha hosi grupu arte marsiais. Ha’u sei ko’alia ho Prezidente Jokowi atu hare, ami nia ema sira mai liu hosi jalan tikus mai halo juramentu ba bandeira mera putih,” PM promote.

Xefe Governu hatutan, dadaun ne’e governu estuda hela prosesu atu taka Grupu Organizasaun Arte Marsiál hirak ne’ebé kontinua kria konflitu no buka mós membru F-FDTL no PNTL ne’ebé envolve iha grupu arte rituál no arte marsiál tenki sai halo de’it juramentu servi nasaun no povu Timor-Leste.

Reportagem : Eva Ximenes

 2,381 Tatal Lee,  1 Views Today