Díli, yokalaumedia.com (12/12/ 2024) – Governu liu husi Ministériu Edukasaun (ME) no Sentru Nasionál Chega (CNC) ho Kooperasaun husi Komisaun Nasionál Organizasaun Nasaun Unida ba Edukasaun Siénsia no Kultura (UNESCO) realiza fórum edukasaun ho tema “Edukasaun Kualidade nian ba Paz Sustentável iha Timor-Leste”, iha Salaun City 8, Manleuana

Diretór UNESCO rezidente Jakarta, Maki Katsuno, hateten katak fórum edukasaun transformativa ne’e nu’udar atividade ne’ebé dedika ba futuru edukasionál ida ne’ebé responsivu no reziliénte, ne’ebé sei apou aspirasaun sidadaun Timor-Leste nian.

“Ita atu reflete kona-ba ita-nia progresu, identifika dezafiu xave sira, no trasa dalan vizionáriu ida ba edukasaun transformadora. Ida-ne’e serbisu hamutuk atu harii sosiedade ne’ebé forte no partisipativu. Mai ita hanoin katak pasu ida-idak ne’ebé ita halo atu hametin edukasaun, saúde, no moris di’ak, ikus mai sei sustenta dame no fó kbiit ba sidadaun hotu-hotu ,” dehan Diretór UNESCO.

Enkuantu Ministra Edukasaun, Dulce de Jesus Soares, hatuir ktak livru  ne’ebé mak hakerek husi timoroan sira, seifasilita tebes  timoroan sira , tanba iha livru ne’e ko’alia kona-ba oinsá mak estudante sira sai ajente ne’ebé bele kuda paz no domin iha rai ida ne’e.

“ba dala uluk, ita iha livru istória no livru manuál ba profesór sira, aleinde sira hakerek livru, fó mós formasaun ba profesór sira, tanba ne’e ita fiar katak, ita-nia estudante sira iha tinan mai ne’e, sira iha livru ne’ebé mak ho konteúdu di’ak liu, no livru ne’e rasik hakerek husi matenek na’in timoroan sira”, dehan Dulce.

Fórum ida-ne’e maka oportunidade atu Halo diagnosa ba objetivu sira ne’ebé aliña ho nesesidade sira ne’ebé iha no mós  aspirasaun sira, tamba joven mak futuru estadu nian.

Liuhusi lansamentu ba livru istória no pás ne’e , UNESCO sente onradu atu fó apoiu ba Timor-Leste nia esforsu atu harii pás liu husi edukasaun.

“Ami parseria  ho Edukasaun, no Sentru Nasionál Chega (CNC)ne’ebé serbisu ona atu hasa’e kapasidade husi profesór istória sira no atu haburas sentidu ida kona-ba patrimóniu ne’ebé fahe, empatia, no reflesaun krítiku entre estudante sira. Edukasaun istória laós de’it kona-ba aprende pasadu maibé mós meiu ida ne’ebé importante tebes atu harii identidade ida-ne’ebé koezivu no inkluzivu”, Hato Nia.

Iha fatin hanesan Diretór ezekutivu CNC, Hugo Maria Fernandes, hateten, CNC harii ho misaun ida atu prezerva memória pasadu no halo memória ne’ebe asesível hodi valoriza no dignifika ema sira mak partisipa iha luta hodi defende direitu umanu no introdús memória sira ne’e ba públiku liu husi edukasaun.

“Ho projetu ida-ne’e, CNC iha oportunidade atu koopera no apreende hamutuk ho UNESCO no Ministeriu Edukasaun, liu-liu Diresaun Jerál Ensinu Báziku, Diresaun Kuríkulu ho INFORDEPE kona-ba dezafiu no oportunidade sira hodi alkansa edukasaun dame ne’ebe sustentável iha Timor-Leste”, Dahan Hugo .

Livru ne’ebé lansa ona, Ministériu Edukasaun sei imprimi livru ne’e ba estudante sira hotu no manuál ba profesór sira , sei  garante katak livru sira ne’e sei iha hotu estudante sira-nia liman no sei fó mós manorin sira.

Tuir jornalista yokalaumedia.com nota katak Iha Forum no lansamentu livru ne’e, hetan mós partisipasaun husi manorin sira husi munisípiu idak-idak.

Reporter : Joanito Rangel

 67 Tatal Lee,  8 Views Today