Dili-yokalaumedia.com-09/02/2023-Projetu Foun neebe lansa husi Plan International Timor-Leste (PITL) ho intensaun atu hateten ba ema hotu hodi hodi empodera grupu marjinalizadu sira, mak hanesan Grupu Feto,  Portador deficiênsia, promove eleisaun partisipasaun inkluzivu husi iha prosesu eleisaun.

Diretora Interina Plan Internasional, Fatima Estrela Soares, haktuir katak sira nia intervensaun atu promove eleisaun iha tinan ne’e sai eleisaun ida neebe demokrátika, Kredível, Signifikativu  no inkluzivu.

“atu informa ba ita boot sira katak asaun husi intervensaun ida nee sei kontribui ba eleisaun ida ne’ebe demokratika, inkluziva no transparente iha ita nia rain”, haktuir Estrela bainhira iha realizasaun workshop iha Delta Nova.

Diretora nee mos subliña liu tan katak Organizasaun non-governamental neebe mak sei implementa projetu ne’e sei foka ba asuntu sira mak hanesan: sosializasaun konaba lei no prosesu eleitoral, sensibiliza radio komunidade sira atu bele publika informasaun konaba eleisaun nian, hasae mos partisipasaun feto iha lideransa no vida politika, no ikus liu promove mos partisipasaun husi ema ho defisiensia sira.

Iha biban hanesan, Provedor Direitu Humanu no Justisa, Virgílio Guterres, kompromete sei diskute mos órgaun eleitoral sira atu nune’e bele toma medida ba promove partisipasaun ema ho defisiensia sira nian.

“PDHJ sei tau atensaun asuntu nee. Ha’u hanoin CNE no STAE tenki halo esforsu hotu-hotu atu garante partisipasaun inklusiva, espesialmente ema ho defisiensia sira”, haklean Virgílio.

Entretanto, Embaixador Uniaun Europeia, Marc Fiedrich, ho orgulho, hateten pronto apoia no fasilita demokratizasaun iha Timor-Leste.

“Uniaun Europeia iha kompromisu atu apoia demokrasia no direitu umanu iha Timor Leste, ami mos fortalese asaun sira husi Organizasaun Sosiedade Sivil atu reforsa governu no povu atu harii demokrasia ida ne’ebe forte no sustentável”, hateten Embaixador.

Diplomata europeio ne’e mos kontinua husu ba parseiro implementador sira atu servisu ho professional.

Implementasaun projetu refere sei finansia husi Uniaun Europeia, no realiza husi Organizasaun Sosiedade Civil mak hanesan ADTL, Belun, JPIC, MOFFE, Patria no Caucus servisu direta ho órgaun Eleitoral sira, CNE no STAE, radiu komunidade, grupu feto, politiku, joven no ema ho difisiénsia, nune’e bele mellora realizasaun festa demokasia no promove partisipasaun inkluziva.

Reportage : Eva Ximenes

 228 Tatal Lee,  1 Views Today