Dili-yokalaumedia.com-14/02/2023 – Ministériu Edukasaun, Joventude no Desportu anunsia rezultadu selesaun  profesor voluntariu  Sira ne’ebe pasa ba kontratadu.

Iha konferensia  imprensa  neebe hala’o iha Vila-Verde, Armindo Maia, Ministru Edukasaun, Juventude no Desportu, esplika katak prosesu rekrutamentu la’o dezde 2021 to’o 2022 ba selesaun profesor voluntariu husi munisipiu 13 la inklui RAEOA hamutuk profesor voluntariu na’in 2.910, admitidu na’in 1.539 no la admitidu mak na’in 1.371. Iha biban nee anunsia mos profesor admitidu na’in 176 ne’ebe durante organiza programa “Eskola ba Uma”.

“Husi númeru ne’e, manorin ba pre eskolar hamutuk 121, ba Ensinu Báziku hamutuk 894, ensinu sekundariu jeral hamutuk 398, Eskola Sekundária Tékniku Vokasionál 126 no programa “Eskola ba Uma” hamutuk 176” hanesan publika ona iha jornal Repúblika”, dehan Ministro Armindo Maia, Tersa-Feira ne’e.

Entretantu, saláriu mensál ne’ebe mak ministeriu sei atribui ba kada profesor, durante tempu kontratu, varia husi dolar $ 204, ba pre-eskolar, no dolar $272 ba ensinu báziku no Sekundáriu. Nivel salarial ne’e sei altera kada tinan.

Iha sorin seluk, Sebastião Barboza hanesan Profesor husi EBC Katólika Canossa, Geovanio de Jesus husi EBF Kuluhun no Segismundo Belo, Profesor husi EBF Tula-Oli Ossú, lamenta ho resultadu ne’e.

Barbosa konta nia voluntaria dezde 2014 iha eskola katólika Canossa Has-laran maibe nia naran la publika, enkuantu ema seluk ne’ebe voluntaria ikus husi nia naran sai.

“ami lamenta tamba kolega balun ne’ebe  hanorin ikus ba ami naran sai iha jornal repúblika maibe ami sira ne’ebe voluntariu iha tempu naruk nia laran naran la sai, tan ne’e ami mai husu klarifikasaun ba parte relevante”, dehan Sebastião Barboza iha resintu MEJD.

Profesor Geovanio de Jesus mos la satisfeitu ho resultadu refere no preokupa ho ema balun ne’ebe la mai husi área edukasaun maibe nia naran sai, enkuantu nia hanesan formadu iha área refere la selesionadu.

Entretantu, Segismundo Belo mos aprezenta preokupasaun hanesan no fundamenta katak mosu indisiu iregularidade balun tanba profesor voluntariu balun ne’ebe foin hahu hanorin iha 2020 maibe iha sira nia dokumentu hatudu fali oin seluk. Nune’e nia sujere atu iha futuru presija kria ekipa ida iha ministeriu atu bele buka tuir iregularidade hirak ne’ebe akontese dadaun ne’e no loke fali rekrutamentu foun.

Hatan ba preokupasaun husi profesor sira ne’e membru Governu, Armindo Maia, esplika katak ministeriu sei fo oportunidade ba Profesor hirak ne’ebe la admitidu atu aprezenta reklamasaun durante loron 15, hahu husi loron publikasaun lista admisaun nian.

“reklamasaun ne’e iha parte rua, (ida ba reklamante nia an, no ida seluk reklamante sei halo konaba iregularidade ne’ebe mosu iha prosesu rekrutamentu ne’e) no reklamante sira mos sei la iha garantia bainhira reklamasaun ne’ebe aprezenta la loos”, hakotu Maia.

 

Reportagem : Nito Rangel & Oscar Quintão

 235 Tatal Lee,  2 Views Today