Dili-yokalaumedia.com-(3/3/2023), “Hametin Unidade ba Desenvolvimentu Nasional” mak tema prinsipal husi komemorasaun loron Nasional Veteranu ba dala VI, Loron 3 Marsu. Tinan ne’e komemora iha palásiu Governu ho hasa’e bandeira nasional no bandeira FRETILIN, CNRT no bandeira FALINTIL nu’udar asaun rekonhesimentu prosesu luta ba libertasaun nasional.

Presidente Parlamentu Nasional, Aniceto Longuinhos Guterres, sai mos hanesan inspetor serimónia, iha diskusu, hateten loron nasional Veteranu ne’e hanesan loron reflesaun hodi hanoin hikas heroi no martires sira nia sakrifisiu no dedikasaun ba libertasaun nasionál.

“veteranu reprejenta faktu istoriku ne’ebe moris husi povu no hamutuk ho povu, la iha veteranu, la iha povu no la iha FRETILIN no FALINTIL, la iha veteranu, realidade tolu ne’e mak fo sentidu ba veteranu,” hateten Aniceito.

Prezidente parlamentu ne’e mos realsa liu tan katak momentu ne’e la’os momentu serimoniál deit, maibe presija hateke do’ok konaba realidade sosiál, ekonomia no politika ne’ebe Timor-Leste ultrapasa ona durante dékada 2.

“loron ida ohin ita hanoin hikas ita nia veteranu tanba sira nia asaun koletiva hamutuk ho povu liberta rai husi ukun invazor nian. Dezenvolvimentu nasionál rekere ita nia unidade ne’ebe metin, karik ita sei sobu malu maka dezemvolvimentu sei la la’o,” realsa Guterres.

Lider iha uma fukun nasionál ne’e mos hakle’an liu tan husu entidade hotu hametin unidade, kolaborasaun no diálogu hodi solusiona problema rai laran inklui mos problema global ne’ebe bele lori impaktu ruma mai Timor-Leste.

Reportazem: Nito Rangel

 253 Tatal Lee,  1 Views Today