Dili-yokalaumedia.com-13/03-2023 – Asosiasaun akadémiku UNTL, ne’ebé kompostu husi senadu fakuldade ho estrutura, inklui senadu jeral Universitáriu organiza estudante foun sira hodi protesta desizaun reitoria nian, ho asaun pasifíku, atu loke praxe akadémiku tinan 2023 ne’ebe mak atu rea iha kampus sentrál UNTL.

senadu jeral UNTL, Cristovão de Araújo, esplika katak asaun protestu refere atu blokeia realizasaun atividade orientasaun akdémika ba tinan 2023, ne’ebe tuir lolos atu realiza iha gináziu Díli, iha loron 13/03/2023.

 “ami lamenta ho despaixu reitor UNTL, João Soares Martins, ne’ebe atu realiza abertura ba praxe  akadémiku ne’e, tanba estudante rihun ida resin mak seidauk rejista no ami husu atu universidade trata estudante hotu ho dignu no igual. Asaun ida ne’e sei kontinua ba iha Parlamentu Nasionál no Ministériu Ensino Superior, Siénsia no Kultura, bainhira reitor la hasoru direta estudante sira”, esplika Cristovão.

Iha okaziaun hanesan, estudante foun 2023, Bryan Inigo Guterres, sente triste relasiona ho atendimentu universidade nian durante prosesu rejistu no husu atu UNTL bele hadia sistema atu fasilita estudante sira bainhira atu halo rejistu iha tempu tuir mai.

“ami sente triste tebes ho atendimentu administrasaun UNTL nian ne’ebe atende ba rejistrasaun estudante nian tanba ne’e husu ba parte relevante atu hadia problema ne’e hodi garante kualidade edukasaun”, rekomenda Bryan.

Hatan ba kestaun ne’e, Reitor UNTL, ne’ebe representa husi Samuel Venâncio Freitas, lori naran komisaun organizadora orientasaun akadémika 2023 nian, deside atu orientasaun ka praxe akadémika sei hala’o fali iha tinan oin, no estudante foun sira tuir direta prosesu ensinu aprendizajen tuir fakuldade ida-idak.

Reportagem : Nito Monteiro & Cedelizio Rego

 208 Tatal Lee,  1 Views Today