Blokeia Praxe akademiku, Vise Senadu FEAH diskorda asaun Senadu Jerál UNTL

Dili, yokalaumedia.com-(/3/2023), Reitoria deside ona hodi adia Praxe akademika UNTL 2023 ba tinan oin, relasiona ho asaun protestu husi universitáriu balun ne’ebe organiza husi Senadu Geral UNTL nian.

Iha fatin seluk, Vise Senadu husi Fakuldade Edukasaun, Artes no Humanidade (FEAH), Francisco de Jesus, ho estudante lubuk ida la konkorda asaun pasifika ne’e.

“la’os individu ida ha’u maka lakohi, maibe buat ida ne’e ita tenki respeita demokrasia. Antes ne’e ami fo opsaun no maioria mak aseita ona, maibe ohin ita hare’e rasik katak estudante husi ami nia fakuldade maioria maka mai iha Gináziu Díli nune’e ami responsavel mos ohin asegura no akompana hodi hein desizaun husi Magnifiku Reitor, mas infelismente la hetan solusaun”, esplika Vice Senadu FEAH.

Entretantu, Dekanu Fakuldade Edukasaun, Artes no Humanidade (FEAH) Teodoro Soares, haktuir katak asaun protestu ne’e di’ak maibe di’ak liu mak resolve liu husi dialogu.

 “Ha’u konkorda ho asaun refere, maibe molok ba iha ne’eba tenki halo uluk karta ida atu ita submete no koko hasoru malu tanba dalan ida di’ak liu maka dialogu. Nune’e akontese ona hanesan ne’e ha’u lakoi fo sala ba kualker parte, maibe ne’e falta komunikasaun, senadu sira bele aponta kestaun ne’be sira ejije maka ita diskute hamutuk atu  ami bele aprezenta ba iha nivel altu. Se la iha ona sulusaun mak foin ita bele blokeia”, haktuir Teodoro.

Tuir observasaun jornalista yokalaumedia.com nian anota katak, asaun protestu ida ne’e provoka dezentendimentu entre estrutura Reitor ho Asosiasaun akademika UNTL.

Reportagem : Cedelizio Rego & Nito Rangel

 245 Tatal Lee,  1 Views Today