Dili, yokalaumedia.com (20/03/2023). Projetu Basic Education Strengthening and Transformation (BEST) Segunda–Feira  ne’e aprezenta rezultadu sensus eskola tinan 2022 ba Ministério Edukasaun Juventude Desportu (MEJD), liu husi semináriu ne’ebe mak realiza iha Villa Verde Dili Timor-Leste.

Gestór Projetu, Apolinário do Rego, haktuir katak liu husi Sensus ba Eskola, BEST konsege rejista eskola ne’ebe mak eziste iha Timor-Leste hamutuk 1.481.

“Ohin ne’e aprezenta rezultadu no progresu ba eskola ne’ebe ita halo ona sensus ba eskola ba eskola 1.481 iha nasionál no sei falta eskola 12 mak  seidauk foti nia dadus”haktuir Apolinário.

Gestór ne’e mos esplika liu tan katak dadus ne’e rekolla atu fasilita di’ak liu tan Ministériu Edukasaun, Juventude no Desportu nia planu infra-estrutura bazeia ba númeru estudante sira nian, promosaun ba profesór sira, funsionamentu Biblioteka inklui melhoramentu fasilidade edukasional sira seluk.

Sensus ba Eskola ne’e hala’o de’it ba eskola Públika no la inklui eskola privada sira ne’ebe mak existe iha Timor-Leste, no realiza desde loron 6-22 dezembru maibe atinji de’it porsentu 62 tanba ne’e extende tan ba loron 10 iha fulan marsu nia laran iha tinan ne’e hodi atinji porsentu 100 no enumerador hamutuk 159.

Apolinário do Rego konta katak iha tinan rua ba kotuk (antes 2022) ekipa ne’e halo uluk ona peskiza badak ida ba eskola hamutuk 147 no indentifika ona eskola 10 mak presija atu hadia tuir planu prioridade.

Entretantu desenhu konklui ona no sei entrega ba Ministériu Obras Públika (MOP), Ajénsia Dezenvolvimentu Nasionál (ADN) no Komisaun Nasionál Aprovizionamentu (CNA-Sigla Portugéz) hodi verifika no valida atu nunee MEJD bele implementa Konstrusaun no reabilitasaun.

Reportazem : Fernando Brites & Nito Rangel

 220 Tatal Lee,  2 Views Today