Dili, yokalaumedia.com-(24/3/2023), Fundo Capital do Desenvolvimento Humano (FDCH) hamri’ik hanesan instituisaun hodi kapasita rekursu Umanu no prepara jerasaun foun hodi desenvolve Timor-Leste, iha tinan 12 ba kotuk.

Tinan ne’e FDCH komemora nia ezisténsia ba dala 12 liu husi lansamentu livru avaliasaun programa sekretariadu nian husi 2015-2020 ne’ene elabora husi peskizadór Afonso de Almeida, iha Delta Nova Díli (23-03-23) ne’e.

Peskizador no Avaliadór, Afonso de Almeida, hateten peskiza refere halo atu avalia programa FDCH nian ne’ebe realiza tiha ona husi 2015 to’o 2020 tanba FDCH aloka fundu hodi benefisia bolseiru rihun resin konta husi 2015 to’o mai 2022 nune’e bele hadi’a di’ak liu tan iha futuru.

“Osamentu ne’ebe ita finansia ne’e ba programa sira hanesan bolsu estudu, formasaun téknika profisional, formasaun língua no formasaun seluk tan tanba ne’e peskiza ne’e rejista katak fundu ne’ebe ita hasai ne’e benefisia ona timor-oan liu rihun 90 konta husi 2015-2022”, hateten Afonso.

Entretantu, Diretor Executivo Fundo Capital do Desenvolvimento Humano (FDCH). Cristovão dos Reis hateten, esforsu tomak ita halo bazeia ba Plano Estrategico do Desenvolvimento Nacional (PEDN) 2011-2030.

 “Ba oin muda mekanismu liu-liu hare ba idade, ba funsionariu ka dosente sira ne’ebe hakarak kontinua estudu ba iha mestradu ne’e tenki tinan 35 no doutoramentu tinan 40, tamba durante ne’e maioria 55 ba leten entaun sira remata mai idade mos reformadu, portantu ida ne’e dezafia ita, ba oin ita tetu hotu esensial ba governu ida atu mai”, Cristovão rekomenda.

Lansamentu Livru ne’e rejista mos partisipasaun husi embaixadór Brazil, reprezentante embaixador Portugal, reprezentante embaixador Indonezia no Funsionariu FDCH.

Reportagem : Cedelizio Rego

 235 Tatal Lee,  1 Views Today