EBF Builale enfrenta problema falta biblioteka no falta sala ba profesór

Viqueque-yokalaumedia.com (31/03/2023)- Eskola Bázika Filial Builale lokaliza iha Liaro Suku Builale, Postu Administrativu Ossú, Kuaze kilometru 30 husi Postu, enfrenta Problema falta Biblioteka no Sala ba profesor sira.

Kordenador Eskola Bázika Filial Builale (EBFB), Ernesto de Carvalho Belo hateten problema ne’e difikulta prosesu aprendizajem ho di’ak no difikulta mos professor sira bainhira atu realiza enkontru.

 “Ami nia eskola iha ne’e, sala enkontru ba profesór sira laiha, bainhira atu halo enkontru ruma ami uja deit sala de aula iha tempu rekreiu. Biblioteka la iha, estudante sira iha difikuldade bainhira atu le livru ruma.”, hateten Ernesto Belo iha nia kna’ar fatin, sexta-Feira (31/03).

Kordenador ne’e mos relata liu tan katak eskola EBF Builale kompostu husi sala 6, utiliza ba prosesu aprendizajem, no eskritóriu 1, ne’ebe hodi rai material aprendizajem hanesan livru, material desportu no ekipamentu sanitária sira.

Cecilia de jesus, estudante 5⁰ ano, afirma katak sira iha livru maibe biblioteka la iha, tanba ne’e husu ba Ministériu Edukasaun, Juventude no Desportu atu hari’i biblioteka atu fasilita sira hodi aprende ho di’ak liu tan.

Tuir observasaun katak eskola bázika filial ne’e iha edifisiu rua, ida konstrui husi ChildFund no ida konstrui husi inan-aman sira, ne’ebe sei uza material lokal no Professor permanente na’in 4 Kontratadu 1 no Voluntáriu 2 enkuantu Estudante hamutuk na’in 100.

Reportagem : Kontributór

 285 Tatal Lee,  1 Views Today