Díli, yokalaumedia.com (17/05/2023) – Forum Organizaaun Non Govermental Timor-Leste (FONGTIL) lansa Relatóriu Auditoria Sosial Tinan 2022, fokadu iha área Saúde no Edukasaun.

Durante tinan 2022, iha área Saúde, FONGTIL identifika katak edifisiu balun difikulta asesibilidade ba ema ho defisiénsia nune’e prejudika sira atu hetan atendimentu ida ne’ebe di’ak.

“ami deskobre katak porvolta 75% husi fasilidade saúde ne’ebe governu konstrui la asesivel ba ita nia maluk difisiénsia sira nune’e  atu asesu ba fasilidade ho diak nune’e bele hetan tratamentu saude ne’ebe diak no identifika mos falta enerjia eletrika iha centro ho postu saúde sira nune’e difikulta pessoal saúde sira atu halo servisu iha tempu kalan”, hateten Diretor Ezekutivu FONGTIL, Valentim da Costa Pinto, (16/05/2023).

Entretantu iha área saúde, iha munisipiu Covalima, FONGTIL deskobre problema  jestaun programa merenda eskolar ne’ebe la’o la di’ak tanba tuir dadus husi estudante rihun atus ida atus hitu hat nulu (100.740 pessoa) maioria mak sei sente hamlaha hafoin han iha eskola.

Relasiona ho problema rua ne’e, Diretur Ezekutivu FONGTIL rekomenda ba governu, espesialmente Ministériu Juventude no Desportu, ho Ministériu Saúde atu fasilita asesilidade portador defisiénsia sira nia, no kontrola jestaun programa merenda eskolar.

“ministériu relevante sira atu bele rezolve kona ba jestaun merenda eskolar nian liu-liu ba jestaun aihan sira tenki diak hodi bele fo saúde diak ba estudante sira, no ministeriu saúde presija mellora planu hodi konstrui edifisiu sira ne’ebe ema ho portador defisiénsia bele asesu”, haktuir Valentim.

Iha relatóriu ne’e mos FONGTIL sita katak iha ema defisiensia barak mos la hetan tratamentu ida ne’ebe di’ak husi pessoal saúde sira tanba hela dook husi centro ka postu saúde sira tanba ne’e reprezentante Sosiedade Sivil ne’e sei relata ba Governu atu tau planu ba orsamentu 2024 nian hodi resolve problema hirak ne’e.

Diretur Ezekutivu Servisu Apoiu ba Sosiedade Civil no Autoridade Sosial (SASCAS-Sigla Portugez), Edvin Soares Noronha, apresia ho relatóriu refere tanba deskobrimentu ne’e bele ajuda governu hodi tau matan di’ak liu tan ba povu.

“SASCAS nia knar ida mak sai hanesan ponte entre sosiedade sivil ho governu tanba dadus sira ne’e sei kanaliza ba Primeiru-Ministru ka governu atu deskute iha Parlamentu Nasionál atu bele tau osan ba resolusaun problema hirak ne’e”, esplika Edvin.

Peskizadora,  Graciana da Silva, hanesan Diretora FMF Liquica, agradese ba Governu tan bele tau ona orsmentu ba Sosiedade Sivil hodi bele halo auditoria sosial nune’e bele identifika problema sira ne’ebe komunidade enfrenta iha baze.

 “Ami hakarak husu ba Governu foun ne’ebe mai nafatin mantein programa Auditoria Sosial ba futuru no tau nafatin orsamentu ba organizasaun sosiedade sivil hodi realiza servisu buka problema sira ne’ebe komunidade infrenta”, Graciana da Silva, propoin.

Lansamentu relatóriu ne’e hetan partisipasaun husi SASCAS, Membru FONGTIL ne’ebe sai hanesan peskizador iha baze.

Reportagem : Eva Ximenes

 3,501 Tatal Lee,  1 Views Today