Maliana, yokalaumedia.com (17/11/2023) – Durante Realizasaun Festival Fronteira, atividade ida seluk husi sira barak mak Semináriu hodi fahe hanoin no matenek konaba interkambiu kultural no rekonsiliasaun entre Timor oan sira, husi Indonézia no Timor-Leste, ne’ebe mak organiza husi Sekretaria Estadu Arte no Kultura no Centro Nasional Chega! IP iha Maliana-Bobonaro.

Prezidente Republika (PR), José Ramos-Horta mos partisipa iha semináriu ba loron daruak nian, ne’ebe ko’alia  kona-ba Dialogu Interkambiu kulturál ho tema “Husi Wehali ba Estadu Modernu, Interasaun Sosiál, Kulturál no Sosiedade Polítika illa Timor husi Tempu ba Tempu”.

Xefe Estadu mos hateten festival ne’e nu’udar inisiu ida ne’ebe di’ak hodi hametin rekonsiliasaun entre timor oan.

“Festivál Fronteira ne’e hanesan inisiativa troka kulturál ida atu hametin rekonsiliasaun entre Timor-Leste no Indonézia”, hateten PR, iha Ginasio Maliana, Kuinta-Feira (16/11)

Aman ba Nasaun ne’e mos afirma katak rekonsiliasaun ne’e importante tanba bele promove futuru ida-ne’ebé pasifika no prospéru ba nasaun rua ne’e.

“Rekonsiliasaun la’ós kona-ba haluha pasadu. “Ita hakarak aprende husi ita-nia istória no uza ida-ne’e nu’udar baze atu harii futuru ne’ebé di’ak liu ba ita-nia povu”, Sublina Ramos.

Entretantu, iha Semináriu Interkambiu kulturál ne’e mos envolve péritu eh matenek-na’in sira husi Timor-Leste no Indonézia hodi fahe hanoin kona-ba evolusaun interasaun sosiál, kulturál no polítika entre nasaun rua ne’e no mos bele troka perspetiva no hasa’e kompriensaun bo’ot liu tan.

Prezidente Ramos Horta nia partisipasaun iha Festivál Fronteira tinan 2023 sai nu’udar testemuña ida ba nia kompromisu ba rekonsiliasaun no nia vizaun ba futuru ida-ne’ebé forte liu no unidade liu ba Timor-Leste no Indonézia.

Reportagem : Eva Ximenes

 518 Tatal Lee,  1 Views Today